Ponteverán 2018 reuniu arredor das súas actividades a preto de medio milleiro de personas. En concreto, foron 427, 226 mozas e 201 mozos, os que este verán formaron parte dos asistentes ás ditas actividades. Deste xeito, das 14 propostas que ofreceu a concellería de Xuventude, liderada por Alberte Oubiña, algunhas delas tiveron que ampliar o número de prazas ante a elevada demanda.
Deste xeito, o obradoiro Terra de zombies, os cursos de robótica e holografía, os xogos de role a aprendizaxe das TIC ofertáronse por primeira vez este ano. Ademais das anteriores actividades, que foron novidades no programa de 2018, houbo tamén actividades que se veñen levando a cabo durante os últimos anos e que son xa clásicos do verán pontevedrés. Dende o campamento de tempo libre ás aulas da natureza, pasando pola noite europea dos morcegos, a xornada de orientación deportiva ou os cursos de piragüismo.
Nunha nota para avaliar a última edición de Ponteverán, o Concello salientou este domingo a demanda de prazas como mostra do éxito do programa. Así, oito propostas cubriron a totalidade das prazas ofertadas, nalgún caso duplicouse a oferta de prazas e mesmo houbo lista de agarda para algunha das propostas.
PRAZAS. Deste xeito, o campamento de tempo libre, a aula da natureza (nos tres obradoiros), observación astronómica, noite europea de morcegos, o obradoiro de cociña, o curso de robótica e holografía e os talleres de piragüismo (nas tres convocatorias) cubriron a totalidade das prazas ofertadas.
Mais non todas as actividades acadaron o mesmo éxito, xa que unha das iniciativas tivo que ser cancelada ao non reunir o número de inscricións mínimas. Trátase da estadía no medio rural que este ano tiña como destino as beiras do río Miño ao seu paso por Ourense.
O programa de ocio xuvenil Ponteverán-18 contou cun orzamento total de 15.250 euros e para a prestación dos servizos foron contratadas cinco pequenas empresas e profesionais autónomos e tres asociacións:Vaipolorío, o Club de Montañeiros e o Club de Piragüismo Río Verduxo de Ponte Sampaio.
Ademais de promover actividades de lecer saudables entre a mocidade, o obxectivo de Ponteverán vai máis alá. O propio Concello, que destaca a importancia de fomentar outros valores como "a convivencia, a igualdade, o respecto ao ambiente, a promoción da actividade física e o coñecemento do patrimonio cultural".
