"Hai cousas por depurar, como sucede con calquera outra apertura", pero en liñas xerais os empresarios implicados no Espazo Gastronómico Sostible O Mercado están "moi satisfeitos" cos resultados que están a cultivar na primeira planta da Praza de Abastos.
O proxecto leva algo máis dun mes en funcionamento e, entre as cousas a mellorar, os hostaleiros destacan a necesidade de ampliar as prazas, insonorizar o espazo, mellorar a iluminación, puír horarios e enriquecer a programación sociocultural. Hai unhas semanas os cheiros tamén formaban parte das tarefas a solucionar, sobre todo durante as mareas vivas, pero o selado dos desaugadoiros tranquilizou os ánimos. "Agora cheiro un pouco á primeira hora a peixe, algo lóxico se pensamos onde estamos, pero en canto se acenden as cociñas xa non se nota", asegura Alberto Collazo, presidente da asociación O Mercado constituída polos hostaleiros.
As necesidades detectadas empuxaron aos responsables das casetas a idear solucións, nas que xa se puxeron a traballar. Unha das máis urxentes é ampliar mobiliario para que poida acudir máis xente e para iso analizan a colocación de novas barras laterais para degustacións de pé e a instalación de máis mesas e cadeiras en espazos que agora están sen uso como, por exemplo, un dos corredores que dan á rúa Sierra. "Vemos que estamos a ter moita demanda, cousa que agradecemos moito á xente de Pontevedra, e por isto estamos a actuar en consecuencia. Queremos usar máis ocos, sen chegar a saturar, pero habilitando máis prazas", sinala Collazo.
Para paliar o rebumbio, están a explorar a posibilidade de colocar "teas ou outro elemento que non destorza a imaxe do Mercado e que axude a absorber o ruído". E para un mellor control da temperatura están a analizar distintos métodos contra a calor e o frío extremo: "Temos que ver como resulta coas cociñas funcionando, pero estamos a ver elementos para o suposto de que haxa baixas temperaturas. E para o verán o mesmo, aínda que non estamos polo labor de climatizar. Isto é un espazo sostible, así que estamos a buscar alternativas eficientes".
ACOLLIDA. Sobre o tema horarios, os empresarios sondan a opción de estender ao sábado o horario continuo aprobado para os domingos (de 12.00 a 23.00 horas). Ademais, a asociación planea dotar ao espazo de máis contido para completar a oferta gastronómica. Por exemplo, con "actuacións en vivo" e sesións de música que serán emitidas a través do fío musical, así como con actividades do tipo "showccokings, conferencias ou incluso presentacións de libros". "Elaboraremos unha programación para cada mes, que daremos a coñecer con antelación", avanza Collazo.
O programa será completado coas iniciativas que prevé desenvolver o C.I.F.P. Carlos Oroza, adxudicatario dunha caseta no que contempla celebrar cursos e degustacións.
Así como están contentos coa acollida do público, o presidente dos hostaleiros afirma que "vemos que o Concello nos apoia". "Estamos en continuo contacto para abordar os temas de xestión e para desenvolver actividades orientadas a dinamizar o mercado. Están moito polo labor, así que estamos moi contentos con este tema". O espazo recibiu este sábado unha nova onda de comensais, entre os que houbo primeiras visitas e repeticións. A valoración xeral é positiva, aínda que hai quen botou en falta "unha carta máis variada".