A feira do vehículo de ocasión Pontemóbil terá segunda edición. O éxito de vendas e de participantes alcanzado entre o venres e o domingo pasado cumpriu sobradamente as expectativas, garantindo o regreso do salón ao Recinto Feiral o ano que vén.
A última hora deste domingo o balance oficial arroxaba máis de 5.000 visitas e un importante número de operacións comerciais. De feito, moitos aproveitaron a xornada do domingo para asinar o contrato de compravenda ou para entregar un sinal como garantía de adquisición dalgún dos 750 automóbiles partícipes na exposición.
Ademais, outra porcentaxe importante de clientes quedou emprazado a visitar in situ as instalacións das empresas asistentes á feira, con vistas a examinar ao resto de unidades en venda. Fronte ao observado noutras citas, nesta ocasión os centros multimarca e os concesionarios albiscaron un maior interese entre os visitantes á hora de comprar un utilitario.
Estiveron expostos preto de 750 vehículos con descontos que chegaron aos 11.000 euros nalgúns modelos
Nesta primeira edición, Pontemóbil reuniu a 20 empresas comercializadoras de vehículos de todas as marcas, modelos, características e prezos.
Os descontos cos que se presentaron no salón foron en exclusiva para os visitantes do evento, chegando a alcanzar os 11.000 euros nalgúns modelos. A mostra dedicou especial atención aos turismos de quilómetro cero, os seminovos (de ata dous anos) e os coches de ata cinco anos, que conformaron boa parte da selección.
Como novidade fronte a outros eventos similares, a feira non só ocupou o pavillón de exposicións, senón que tamén a totalidade do parking exterior, onde se colocaron varias carpas para ofrecer ao visitante unha maior oferta ao cuberto da choiva. Todos os turismos expostos contan coa garantía dos seus respectivos vendedores, procedentes de Pontevedra e distintas localidades de Galicia.
No evento, organizado por Diario de Pontevedra, participaron os concesionarios de automóbiles Detroit Móbil, Ibericar Gestoso (Renault), Noacar Motor, Autos Diz, Antonio Pintos Herves, Grupo Abreu, Mourente Motor, Galaicar, Roipesa (Nissan), RS Automoción, CCK Autos, Auto Ilusión, AC Performance, Pneumáticos Gallardo, Virmóvil, AC Castiñeira, Dalonga, Tilve Sport, Multicar Center BMW (Celtamotor), Autolunas Glass Drive, Axencia de Seguros Fernández, Space Cars, Rodas Galicia e Sercar (Opel).
