As expropiacións ao novo viario ao Gran Montecelo custarán 400.000 euros. Así o confirma a este xornal a Consellería de Infraestruturas, que asegura que o departamento que dirixe Ethel Vázquez iniciou unha revisión á alza dos terreos que será necesario ocupar para construír esta vía perimetral.
A estrada sairá da contorna da rúa Ángel Limeses, cerca do Furancho A Carrasqueira; bordeará a parte traseira do hospital, afectando no seu maior parte a solares de monte e leiras, e desembocará fronte ao pavillón de Príncipe Felipe. A infraestrutura terá unha lonxitude de 830 metros, catro rotondas e un novo sistema de iluminación, que se reforzará nos pasos de peóns que se coloquen na zona.
Aínda que as expropiacións correrán a cargo da Xunta, o Concello de Pontevedra encargarase de facer o viario perimetral. O proxecto someterase a información pública para que as persoas afectadas poidan presentar as correspondentes alegacións. Neste proceso farase constar a relación de bens e dereitos afectados pola obra.
Unha vez que se resolvan as posibles reclamacións, o seguinte paso será a aprobación do deseño definitivo da estrada para formalizar a ocupación dos terreos necesarios para os traballos. Ao haber un plan de supramunicipalidade non fará falta un novo decreto de utilidade pública, o que facilitará os trámites. A partir de entón, a Axencia Galega de Infraestruturas convocará o levantamento de actas previas e de ocupación.
Deste xeito, o Goberno galego completará o plan expropiatorio para o Gran Montecelo, que incluíu a ocupación de cinco casas, un viveiro e leiras privadas. Aínda que a maior parte dos afectados xa desaloxaron as súas propiedades, a Administración autonómica deu outra prórroga, a quinta, para que os veciños aos que a ampliación do centro sanitario lles levou a súa casa ou negocio por diante culminen a mudanza.
O hospital único será construído por tres empresas galegas: Pontes, Copasa e Ogmios. Tras un concurso inicial errado, que a Xunta anulou ao haberse presentado unha única oferta, o proxecto modificouse á alza e finalmente foi adxudicado por máis de 121,8 millóns de euros. A do Gran Montecelo é a obra pública máis cara na historia de Pontevedra, que leva reclamando este proxecto desde finais dos anos 90.
O proxecto sectorial do centro sanitario permitirá acelerar a ocupación de bens, cuxa tasación a Xunta revisa á alza
