jueves. 28.10.2021 |
El tiempo
jueves. 28.10.2021
El tiempo

Facenda recadou ata xullo 2,2 millóns ao día en Pontevedra, máis que antes do covid

undefined
A oficina local de Facenda pasou de recadar 1,9 millóns en 2020 a algo máis de 2,2 millóns este ano .
Cidadáns e empresas da comarca achegaron ata xullo 462 millóns, 9 máis que en 2019. Os pontevedreses pagaron â?? Este ano 26,2 millóns máis de IRPF, mentres a facturación empresarial é hoxe un terzo da rexistrada hai dous anos

A crise instalada durante a pandemia ten un reflexo curioso na caixa de Facenda. Polo menos así ocorre na comarca de Pontevedra, onde as familias pagan máis, mentres as empresas ingresan menos. A oficina local da Axencia Tributaria, que recada boa parte dos impostos en case unha vintena de municipios da contorna, cobrou entre xaneiro e xullo deste ano 462,1 millóns de euros, o que promedia 2,2 millóns cada 24 horas.

Antes do estalido do covid, nos sete primeiros meses de 2019, a colecta foi 9 millóns máis pequena, de 553 millóns. O ano 2020, marcado polos confinamentos e as restricións á mobilidade, a achega tributaria caeu ata 408 millóns en Pontevedra.

O desconcertante é que os tributos que gardan relación coa renda das persoas son os que dispararon no presente exercicio económico os resultados da caixa fiscal comarcal. E mentres isto sucedía, os impostos relacionados coa facturación e as actividades empresariais seguen recadando aínda por baixo de 2019 e, nalgúns casos, como o Imposto de Sociedades, tamén por baixo do ano 2020.

O exemplo máis nítido é o do imposto sobre a renda das persoas físicas (IRPF). Aquí os mesmos cidadáns que deixaron na caixa da oficina local da Axencia Tributaria 184,2 millóns de euros entre xaneiro e xullo de 2019, antes do estalido do coronavirus, achegaron este ano ao "cepillo" de Facenda 26 millóns máis, ata os 210,4. En 2020, o exercicio marcado polo parón dunha boa parte das actividades, os ertes e os peches de moitas empresas, o IRPF dos sete primeiros meses quedou por baixo dos 179 millóns de euros.

E O mesmo sucede coa renda do non residentes na provincia, que achegaron este ano 2 millóns, fronte aos 1,7 que pagaran en 2019.

O IVE, outro imposto que garda unha relación directa co consumo, perdera 30 millóns de euros entre xaneiro e xullo de 2020 respecto do recadado en 2019. Pero neste ano recuperou íntegros os 30 millóns volatilizados no exercicio anterior.

Por contra, quen non achegaron ás arcas públicas o que viñan facendo ata agora son as empresas. O Imposto de Sociedades, que grava directamente as rendas empresariais, segue esborrallándose desde que o virus comezou a correr por todo o mundo.

Na oficina local de Facenda, as empresas deixáronse 28,2 millóns de euros entre xaneiro e xullo de 2019. Chegou a pandemia e as achegas fiscais das mesmas sociedades derrubáronse ata os 18,2 millóns de euros. E este ano, no que o Goberno fala xa de indicios de recuperación, o Imposto de Sociedades segue en picado cunha recadación que apenas pasa dos 7 millóns nos sete primeiros meses.

Se este tributo garda unha relación directa coa facturación empresarial, a conclusión é que esta caeu ata ser agora un terzo do que foi en 2019.

Cun comportamento similar aparecen os tributos que inciden sobre o tráfico exterior, que en plena pandemia (2020) achegaron ao cofre fiscal pontevedrés 5,1 millóns de euros ata o mes de xullo, e que este ano non pasan dos 5 millóns no mesmo período.

Ou os impostos especiais, unha tributación indirecta sobre algúns produtos entre os que están o alcol, o tabaco, os combustibles ou a matriculación de vehículos, pero tamén, por exemplo, o imposto sobre a electricidade. Neste caso, a recadación dos sete primeiros meses pasou de 502.000 euros antes da pandemia (2019) aos 545.000 euros do presente exercicio económico.

Facenda recadou ata xullo 2,2 millóns ao día en Pontevedra, máis...
comentarios
ç