O faladoiro máis grande de Pontevedra

Probablemente Ti non es de Pontevedra se... non coñeces o grupo de Facebook que leva este mesmo nome. Fundado o 5 de xullo 2014, converteuse no punto de encontro máis xigantesco da cidade, superando a barreira dos 18.000 integrantes. Concretamente, 18.226, que cada día poden asistir a todo tipo de debates sobre a Boa Vila, ou se o prefiren, evocar pedazos da súa nostalxia en forma de recordos, fotos e vivencias que os usuarios rescatan da súa memoria.

Lonxe de ser unicamente unha hemeroteca, o grupo pontevedrés conseguiu reunir a amigos da infancia que levaban máis de catro décadas sen verse, ou brindou a oportunidade de que familias separadas pola emigración se reecontraran de novo ou se chegasen a coñecer.

María do Porto Portela é a fundadora deste grupo e, durante anos, tamén a encargada de moderar os contidos que se publican. Conta que seis anos atrás, cando fundou este espazo, levou unha gran sorpresa ao ver que en tan só dous días foron máis de 2.000 os membros que se incorporaron ao muro: "Pensei que estaría ben crear un espazo con historias de xente de Pontevedra, para xente de Pontevedra. O que non me esperaba era a incorporación de 2.000 persoas tras a súa creación". As cifras multiplicáronse exponencialmente ao longo dos anos e para mellorar a convivencia decidiuse establecer unha serie de normas.

Entre elas destaca a prohibición de falar sobre política, terrorismo ou temas relixiosos. Ademais, non se permite insultar ou afear a conduta doutros membros, publicar mensaxes que vulneren dereitos como a propiedade intelectual ou facer propaganda electoral. Con todo, pese ao cumprimento da maioría destes requisitos, publícanse cada día informacións relacionadas coa actualidade política, que os seus membros comparten e comentan sen entrar en grandes discusións. Xunto á fundadora, outros membros como Rafael Crespo, Chacho Igrexas ou Pili González encárganse de administrar e vixiar que se cumpra esta normativa de pertenza.

Na súa faceta máis histórica, distintos usuarios publicaron ao longo do tempo fotos antigas de celebracións actuais como as festas da Peregrina, festas do Nadal como a cabalgata ou algúns concertos como os do grupo Queimada. Tamén é posible observar a evolución dalgúns espazos como o Pazo da Cultura, a praza da Ferrería ou a antiga cheminea da fábrica de ladrillos da Caeira. Moitos destes documentos son rescatados de álbums familiares, que de non ser publicados neste espazo caerían no esquecemento.

Na actualidade, serve de espazo de reunión para comentar os temas que preocupan aos pontevedreses, ofrecer recomendacións ou publicar fotos da cidade e os seus arredores naturais.

Outra das súas utilidades é como punto de unión cos amigos e coñecidos do pasado, así o explicaba María do Porto: "A páxina tamén puxo en contacto a, por exemplo a min mesma, que xa non vivo en Pontevedra con contactos que perdera polos anos que pasei fóra. Ademais de reencontranos, puidemos manter o contacto desde entón polo grupo". Tamén afirma que serve como enlace permanente coa cidade, que visita menos do que lle gustaría: "funme de Pontevedra con 15 anos a estudar fóra, e aínda que volvo en vacacións, grazas ao grupo podo estar conectada ao que ocorre".

Ti non es de Pontevedra se... tamén foi un punto de unión entre as xeracións de familias separadas pola inmigración: "hai netos de xente de Pontevedra que emigrara a Arxentina e que reencontrou aos seus familiares en Galicia a través do grupo coa axuda dos seus membros. Tamén hai moita xente de países latinoamericanos que viven alí, e son netos de xente de aquí, que colaboran e están totalmente integrados no grupo. Somos moitos os que vivimos en diferentes lugares, hai membros ata de Nova York".

A fundadora recomenda unirse ao grupo porque "achega moito sobre a cidade, permite decatarse das novidades e coñecer as súas marabillas históricas". Ademais, declara que todo o mundo é benvido e que a sala virtual caracterízase por ser moi libre, diverso, e sempre aberto a todo o mundo.