Julio Mariño, presidente da Sociedade de Caza e Pesca de Lalín, faleceu este sábado no Hospital de Montecelo de coronavirus, aos 65 anos de idade.
O lalinense levaba ingresado no centro hospitalario pontevedrés desde o pasado 25 de setembro, logo de dar positivo na proba de covid-19.
O seu funeral celebrarase este domingo, ás 17.00 horas, na capela do Tanatorio O Deza cun aforamento máximo de 25 persoas. Posteriormente, o enterro será no cemiterio da Romea.
Así, o sábado producíronse cinco novos decesos confirmados, elevando a 981 a cifra oficial de vítimas mortais da covid-19 en Galicia desde o inicio da pandemia. A segunda finada foi unha muller de 72 anos, da residencia DomusVi Ribadumia, que se atopaba no Hospital do Salnés. A lista completouse con home de 76 anos ingresado no Complexo Hospitalario Universitario da Coruña, unha muller de 91 no Hospital Virxe da Xunqueira de Cee e un home de 86 anos ingresado no Chus de Santiago.
