Atende por teléfono desde Madrid, pois María Triñanes Costa (O Grove, 26 anos), está estudando na Universidad Complutense o terceiro curso do Doble Grado en Turismo y Comercio. Pero esta moza acaba de recibir agora un dos 26 Premios Nacionales de Formación Profesional de Grado Superior correspondentes a 2017, un por cada familia profesional. Aínda que hai outros sete galegos, catro deles da provincia de Pontevedra, ela é a única de Hostelería y Turismo. En 2017 rematara, cunha nota que rozaba o dez, o CS de Xestión de Aloxamentos Turísticos no CIFP Carlos Oroza, do que garda un recordo marabilloso e desde onde a felicitaron publicamente. O galardón está dotado con 1.200 euros e un diploma acreditativo.
Vén de gañar un premio nacional tres anos despois de recibir o autonómico [outorgáronse conxuntamente tamén os de 2018 e 2019 a un total de 78 persoas, 13 delas galegas]. Esperábao?
Sorprendeume bastante recibir a candidatura despois de tanto tempo. Chegoume un e-mail dicíndome que estaba convocada para os premios nacionais, onde miden a traxectoria desde o autonómico. Ponderan varios aspectos: en que traballaches, os idiomas que aprendeches, diferentes cursos... Pois imos probar. E agora sorprendidísima, non contaba!
Cando rematou o ciclo en Pontevedra tiña pensado volver a Malta para traballar na recepción dun hotel. Cumpriu os seus plans?
Estiven alí preto dun ano. Foi unha experiencia incrible, porque era a primeira vez que traballaba fóra de España e tanto o trato foi moi bo, aprendín moitísimo inglés, a desenvolverme alí... Na recepción cada día é diferente. De feito insistíronme en quedar, pero sentín que a miña etapa alí estaba rematada. Quería coñecer outros campos do turismo, máis aló dos hoteis. Por iso agora estou aquí, na Complutense de Madrid, estudando un dobre grao de comercio e turismo.
A que se debeu este xiro?
Dende que empecei a traballar estiven no mundo dos hoteis, que me encanta, pero empecei a coñecer outras facetas do turismo. De feito agora gústanme máis cousas como a planificación turística dun destino, xestionalo de xeito sostible... E a parte do comercio e as empresas tamén me está gustando moito.
"As axencias de viaxes, se estaban en declive, penso que van saír beneficiadas da pandemia grazas ao trato persoal"
A pandemia pillouna xa na Universidade? Que supuxo?
Estiven o primeiro cuadrimestre sen pandemia e xusto despois dos exames pechou todo. A experiencia da universidade foi un pouco diferente por iso, estou empezando a vivila agora. No meu caso, despois de ter traballado, ía con outra mentalidade e a pandemia fixo que estudase máis aínda. Foi moi estresante.
Volverá a Galicia?
Eu teño claro que vou volver e, na medida do posible, quero traballar alí. A curto prazo a miña meta é ir de Erasmus a Alemania porque é un dos idiomas que estudo aquí e unha das cousas polas que estudo na Universidade é poder aproveitar esa oportunidade de coñecer outro país. E despois rematar, porque son dúas carreiras, cinco anos, dous traballos de fin de grao... Aínda queda moito. E despois, se teño unha oportunidade en Galicia, máis se é no Grove... A calidade de vida que hai en Galicia non a cambio por nada, de feito parezo a embaixadora en Madrid.
O turismo foi un dos sectores máis afectados pola pandemia. Que se pode aprender despois disto?
No Mediterráneo, sobre todo, despenden moito do turismo estranxeiro e agora desmostrouse que non se pode ter tanta dependencia dun turismo de sol e praia e de portas para fóra. Hai que traballar noutros tipos de turismo, como o de interior, e estudar ben os recursos que temos no país ademais das praias. Un dos que máis creceu foi o turismo rural, a vida máis tranquila, os espazos ao aire libre... Que os españois valoremos o que temos e que o turismo é un sector que inflúe en todos os demais: ten que ver coa hostelería, cos transportes, cos hoteis, cos supermercados... Viuse que é máis importante do que se pensaba, que fan falta profesionais que traballen aquí e miren de cara ao futuro e se poñan en valor. Parece que non é o mesmo estudar Turismo que unha enxeñería, pero neste país necesitamos as dúas cousas.
Cre que nestes últimos tres anos se está valorando máis a profesionalización do sector, desde recepcionistas de hotel a guías turísticos ou mesmo axencias de viaxes?
Totalmente. En recepción penso que hai menos intrusismo. E en axencias de viaxes púxose totalmente en valor ter uns profesionais que axuden a resolver calquera cousa. Coa pandemia viuse reflectido que non o máis barato é sempre o mellor. Cando buscas nun gran turoperador os voos máis baratos podes conseguilos, pero se tes algún problema non tes a ninguén que che axude, que che aconselle... As axencias, se estaban en declive, co trato de persoa a persoa creo que van saír moi beneficiadas da pandemia. E o mundo dos hoteis e de guías turísticos. A xente quere volver saír, coñecer o que temos no país, a de fóra quere vir e é moi importante que che conten ben as cousas, con carisma e coñecemento.
Agora que está na Universidade e pode comparar as dúas experiencias, segue apostando pola FP como "un máster gratuíto de dous anos"?
Esa segue sendo a mesma frase, pero é especializarte nunha rama moi concreta. Pero a día de hoxe, sen ser un traballo básico, obríganos a ir traballar nun nivel e ir collendo experiencia pouco a pouco e igual alguén cunha carreira universitaria opta directamente a outro posto. Eu non o decidín por iso, senón por ampliar o abano. A FP é algo moi concreto, chegas ao mundo laboral sabendo o que tes que facer, e a carreira dá unha perspectiva máis grande pero non te especializa. Fóra de España sentín que valoraban moito que tivera unha FP superior con boas notas. Pero aquí segue habendo titulitis.
