A axenda ditaba que este luns era o día de inaugurar o novo edificio institucional de Benito Corbal, pero na práctica a cita deu para moito máis. O presidente da Xunta, Alberto Nüñez Feijóo, e o alcalde da capital, Miguel Anxo Fernández Lores, aproveitaron a ocasión para correr un tupido veo fronte aos ataques proferidos "en campaña" e para iniciar negociacións sobre os proxectos en carteira que implican a ambas as administracións.
A apertura da sede da Xunta serviu para que Feijóo e Lores anunciasen o que será o seu sexto cume institucional para abordar temas ‘pendentes' na cidade e que terá lugar nos primeiros días de xullo. Ademais do Gran Montecelo, a Intermodal ou a Cidade da Xustiza, ambos se mostraron dispostos a falar de novos "proxectos".
Sobre a mesa estarán o transporte metropolitano, o saneamento da ría, o futuro da sede de Facenda, a variante de Alba ou a residencia de maiores, entre outros asuntos.