Aínda que o temporal Filomena non deixou en Pontevedra as nevadas que cubriron de branco outras partes do país, os seus efectos si chegaron ata as Rías Baixas. E é que o bloqueo de vías de comunicación terrestre por culpa da neve e a paralización de numerosas actividades na capital de España (incluída a gran central loxística Mercamadrid, que este luns seguía pechada) están a deixarse notar tamén na provincia pontevedresa. Empresas que se abastecen ou que envían os seus produtos ao centro, ao leste e ao sur da Península víronse prexudicadas estes días por mor das dificultades para o transporte por estrada.
Tal e como explicou este luns Ramón Rodríguez, xerente de Frutas Sol, "ao estar as estradas colapsadas pola neve os camións non puideron circular o fin de semana. A nós víñannos tres desde Valencia pero quedaron bloqueados na zona de Cuenca. Tiñan que chegar aquí o domingo. E o problema non é só cos transportes que veñen cara aquí, senón tamén cos que van cara a outros puntos de España. Nós usamos transportes que saen desde Galicia cargados de peixe e volven con froita e estes días tampouco puideron saír. Este luns queriamos cargar mercancía en varios sitios e non se puido".
Segundo precisou este empresario, o problema é que moitas das rutas que se empregan para comunicar a provincia de Pontevedra con outros lugares de abastecemento pasan por Madrid, que é unha das zonas que se está levando a peor parte do temporal de frío. Almería, Murcia ou Valencia están entre os principais provedores de froitas e hortalizas "e os camións que veñen desde eses puntos atravesan a comunidade madrileña, así que estes días non puideron pasar", aclarou. "Outros anos hai neve en León ou Burgos e xa se conta con iso, pero unhas nevadas tan fortes coma estas e que afectasen tanto ao transporte non o recordo", apuntou o xerente de Frutas Sol.
Ramón Rodríguez: "Os camións que veñen cargados desde Levante ou Almería pasan por Madrid, así que estiveron bloqueados"
Segundo engadiu, polo momento houbo poucos problemas de desabastecemento nas fruterías porque contaban con stock, pero o máis probable é que nos próximos días algúns produtos "si poden faltar e outros serán máis caros".
As existencias acumuladas nos almacéns e os provedores locais son, precisamente, os que están a salvar a situación en supermercados e hipermercados. En palabras de Francisco Couso, director de Relacións Institucionais de Carrefour, "no noso caso, o bloqueo dunha parte do país polo temporal non se está notando tanto en alimentación, porque traballamos con subministradores galegos, senón máis noutro tipo de bens de consumo, como televisores ou artigos de bazar, por exemplo, que veñen de fóra. Nestes casos, a mercancía que estaba cargada para sábado, estaba a chegar o luns".
Segundo apuntou este responsable de Carrefour, "de momento nos nosos centros hai surtido de todo e non está a haber carencia. Se o bloqueo pola neve se prolonga máis tempo, a semana que vén si podería habela, aínda que non creo que iso vaia suceder porque se lle está dando prioridade absoluta ao abastecemento de alimentación e xa empezaron a moverse camións pola M-40 e por outras vías".
Se hai apenas mes e medio os produtores de pepinos e tomates víanse abocados a deixar perder moitas toneladas polos baixos prezos de entón (16 céntimos o quilo de pepinos e 14 o de tomates), nestes momentos non paran de encarecerse: o pepino xa rolda os dous euros por quilo en orixe, o calabacín e o pemento xa os superaron, do mesmo xeito que as xudías verdes que se salvaron, por citar algúns exemplos.
Tamén en Galicia os grelos queimáronse coas xeadas, así que está a resultar máis difícil atopalos nas froiterías e supermercados.
EXPORTACIÓNS. Ademais de atrasar certas subministracións á provincia, a situación xerada por Filomena tamén está a afectar ao envío de produtos das Rías Baixas a outras partes de España, por exemplo de artigos do mar.
Tal e como manifestou Juan Manuel Outeda, presidente de Agacomar (Asociación Galega de Comercializadores de Marisco), "o fin de semana non se puideron cubrir rutas cara a Madrid, Lérida, Huesca... nin cara ao Sur. Non está a haber perda de produto porque foi pouco tempo, nin creo que haxa desabastecemento, pero si se perde de vender ese día. Este luns xa se podía cubrir todo salvo Madrid".
MRW: "Desde o venres non puidemos recibir nin enviar a Madrid nin arredores"
A maiores das empresas de alimentación, os problemas no transporte motivados pola neve están a prexudicar a firmas de outros sectores que reciben subministracións desde outras partes de España ou que fan envíos fóra. No polígono industrial do Campiño hai varios casos e un deles é Mape, unha almacenista farmacéutica. "As entregas a Madrid están paradas", explicaron alí.
No que respecta a Correos, nos centros de tratamento de Madrid a compañía suspendeu a actividade desde a tarde do venres e paralizou a saída da rede nacional e o persoal da quenda de tarde. O peche da actividade tamén levou a cancelar as quendas de noite e todos os do sábado e do domingo en devandita comunidade.
Na base que MRW ten no polígono do Vao sinalaron este luns que non poden recibir nin enviar nada á capital de España nin toda a área xeográfica circundante desde o pasado venres, o que está a provocar atrasos de varios días nestas entregas.
