A empresa pontevedresa Coverwind Solutions, S.L., especializada en prestar servizos correspondentes a cada unha das fases dos proxectos para a industria eólica, foi galardoada este martes co Premio Peme do Ano 2019 convocado pola Cámara de Comercio de Pontevedra, Vigo e Vilagarcía de Arousa e o Banco Santander. Ao certame concorreron máis dun centenar de pemes pertencentes á demarcación cameral.
O acto que tivo lugar este martes na sede viguesa da Cámara tivo como obxectivo recoñecer o labor das pequenas e medianas empresas como xeradoras de riqueza e creadoras de emprego no desempeño do seu labor cotián.
Na relación de entidades premiadas tamén se atopa a pontevedresa Hifas da Terra (centro de biotecnoloxía centrado na investigación e a innovación cun alto grao de especialización no desenvolvemento de nutracéuticos a partir de fungos medicinais), que recibiu o accésit á Responsabilidade Social. Completan a relación de entidades galardoadas Plaintec, Obras e Servizos (Tuy), que recibiu o accésit á Formación e o Emprego; Granitos Cabaleiro (O Porriño), que obtivo o accésit á Innovación, e Esypro Manutención (Gondomar), que recibiu o accésit á Internacionalización.
O xurado do Premio Peme do Ano 2019 tivo en conta o incremento da actividade e mellora dos resultados da empresa, a creación de emprego (prestando especial atención á calidade do mesmo), a internacionalización da empresa, a introdución de innovacións e a adopción de medidas de formación.
