Fisioterapia e Enfermería, as carreiras preferidas do campus pontevedrés

Fisioterapia e Enfermería seguen reinando no ranking das carreiras preferidas polos alumnos do Campus de Pontevedra, mentres que Dirección e Xestión Pública, tanto na súa versión presencial como na semipresencial, e Enxeñería Forestal repiten como as titulacións menos demandadas polos futuros universitarios. Así se deduce da listaxe das notas de corte provisionais que a CIUG deu a coñecer onte xunto á convocatoria de matrícula dos alumnos para o curso 2017-2018, que suman 12.069 neste primeiro prazo.

No campus de Pontevedra están chamados a matricularse 694 mozos para algunha das 715 prazas ofertadas. Deles, 511 lograron entrar na titulación elixida en primeiro lugar. Teñen de prazo para matricularse ata o venres ás 14.00 horas.

As notas de referencia, que variarán durante as próximas semanas, deixan a Fisioterapia no primeiro lugar das titulacións máis desexadas do campus pontevedrés, cun 10,806. Séguenlle Enfermería (10,340) e Comunicación Audiovisual (9,230).

En cuarto lugar sitúase Publicidade e Relacións Públicas (8,870). A relación complétase con Ciencias da Actividade Física e do Deporte (8,500), que ademais precisa dunha proba de acceso específica; Publicidade e Relacións Públicas (8,870); Educación Primaria (8,290); Educación Infantil (7,933); Belas Artes (7,100); Dirección e Xestión Pública (5,410 na modalidade semipresencial e 5,020 na modalidade presencial) e Enxeñería Forestal (5,00).

EN GALICIA. As carreiras que presentan unha maior nota de referencia nas tres universidades galegas son o dobre grao de Matemáticas con Física e o de Enxeñería Informática e Matemáticas da USC, nas cales os alumnos deben obter unha media de 13,466 e 13,226 puntos, respectivamente. O Campus de Santiago é precisamente o que presenta unhas notas de referencia máis elevadas, segundo a listaxe feita público pola Comisión Interuniversitaria de Galicia, posto que conta con 16 titulacións que superan notas de 10 puntos.

As seguintes carreiras da USC con maior puntuación esixida son o dobre grao en Comunicación Audiovisual e Xornalismo, que conta cunha nota de referencia de 12,942; seguida de Medicina, con 12,575; os dobres graos de Química e Física, con 12,390 , e de Química e Bioloxía, con 12,296; así como Odontoloxía, con 12,15. No Campus de Lugo, a cualificación máis elevada corresponde a Veterinaria, con 11,066.

Pola súa banda, na Universidade de Vigo, a maior puntuación de referencia tena Tradución e Interpretación Español-Inglés, con 11,812; seguida de ADE-Dereito, con 10,95, mentres que no campus de Ourense, Enxeñería Aeroespacial esixe unha cualificación de 11,78. Finalmente, na Universidade de A Coruña, as notas medias máis altas son o dobre grao de Bioloxía e Química, cun 11,95, e o de ADE e Dereito, cun 11,086, mentres que no campus de Ferrol, Enfermería, cun 9,7, é a máis elevada.

Estas notas constitúen unha referencia, dado que a nota de corte establécese cando se peche matrícula.

O primeiro prazo de matrícula estará aberto ata as 14.00 horas do día 14. En total, hai oito convocatorias para matricularse nas universidades galegas. A preasignación de prazas quedará resolta para tres destes prazos no mes de xullo, no que a CIUG espera que xa quede matriculado unha porcentaxe "moi alta" de estudantes, que podería alcanzar o 80%. Posteriormente, haberá outros tres prazos en setembro e finalmente, outros dous máis en outubro.