Cen anos cumpriu este xoves Olga Macías Martínez, que celebrou o seu aniversario en compañía da súa neta e das traballadoras da residencia de maiores de Campolongo, onde vive xunto a outros 96 internos. Olga é a única centenaria do centro.
Esta pontevedresa "de toda a vida", bordadora de profesión, ten sete fillos, 27 netos, 30 bisnetos e tamén tataranetos. Tras quedar viúva a unha idade temperá, ao cumprir os 65 decidiu ingresar nunha residencia por vontade propia. Primeiro estivo en Lugo e, tras lograr praza en Campolongo, regresou a Pontevedra.
"É moi educada e activa. Fai ximnasia e antes do coronavirus pasaba todas as tardes na cafetería", asegura a directora do centro, Mayte Caneda.
O servizo de cociña preparoulle unha torta á nova centenaria, que soprou as cen velas e emocionouse coa festa organizada na súa honra nunha zona de visitas con todas as medidas de seguridade. O alcalde, Miguel Anxo Fernández Lores, levoulle un ramo de flores.
