A subdelegada do Goberno, Maica Larriba, entregou onte a Cruz de Prata da Orde do Mérito Civil a Jesús Manuel Serrano Corroto, integrante da Oficina de Xestión Económica da Comandancia da Garda Civil en Pontevedra, "en recoñecemento ao seu esforzo continuado por axilizar os procedementos de pago a provedores".
Seguindo as directrices marcadas polo Ministerio de Facenda e a Lei 25/2013, de 27 de decembro, de impulso da factura electrónica e creación do rexistro contable de facturas no Sector Público, o garda civil Jesús Manuel Serrano Corroto realizou "un esforzo continuado" para reducir o prazo legal do pagado de facturas, conseguindo que a Oficina de Xestión Económica da Comandancia abone todas elas nun prazo medio de 15 días, a metade do que estipula dita lei.
Durante o acto de entrega -ao que asistiron o coronel xefe da Comandancia da Garda Civil, Simón Venzal, e Francisco López Pena, delegado de Facenda en Pontevedra, de quen partiu a proposta da concesión da medalla-, Larriba destacou que o condecorado "encarna os principios de boa fe, eficacia e eficiencia que se lle esixen ás administracións públicas nas súas actuacións".
A subdelegada do Goberno subliñou a importancia da Oficina de Xestión Económica e do labor desenvolvido polo garda Serrano e os restantes integrantes do equipo, xa que "o correcto control contable das facturas permite non só facer un mellor seguemento dos compromisos de pago da Administración, senón tamén levar un mellor control do gasto e déficit públicos, o que redunda nunha maior confianza nas contas públicas".
Ademais, Larriba destacou que esta condecoración é unha distinción ao "traballo diario, incansable e sacrificado sempre dos axentes da Garda Civil. Un traballo que o teu e os teus compañeiros e compañeiras de Corpo desenvolvedes de forma discreta pero rigorosa e tenaz para garantir a seguridade da cidadanía de Pontevedra e que fai que os veciños e veciñas desta terra teñan en alta estima e consideración o voso labor". "Sodes un orgullo para todas e todos. Esta Cruz é o testemuño dunha vida dedicada a servir e protexer aos demais", destacou a subdelegada do Goberno en Pontevedra.
