A desescalada da hostalería tamén chega ao gastroespacio de Pontevedra. A primeira planta do Mercado de Abastos recuperou esta semana dous dos postos que estaban pechados polas restricións da pandemia do coronavirus: un dedicado á pescada e outro ao mexillón.
"Abrín o venres. Empezamos con forza e moi contentos", explica Afonso Díaz, da Merluzateca, que defende que a instalación municipal supera os estándares de seguridade fronte á covid-19. "Este é o
Aínda que ten unha capacidade para 250 persoas, o aforamento da instalación municipal está limitado a 116 persoas no gastroespazo. O servizo de terraza, que o sábado non funcionou polo mal tempo, conta con oito mesas.
Rui López Santiago, Cervexería O Quiñón: "Está a cousa irregular. Hai días mellores e días peores. Pero imos saíndo adiante"
"Está a cousa irregular. Hai días mellores e días peores. Pero imos saíndo adiante", comenta Rui López Santiago, da Cervexería O Quiñón, que afirma que os clientes non teñen reparos en ir ao Mercado "porque o seu interior é moi amplo, os teitos son altos e hai bastante espazo". "En xeral, os pontevedreses son de ir ás terrazas, e agora moito máis. Pero aquí non percibimos o medo da xente a consumir en espazos pechados que podería darse noutros lugares", engade. De momento, o seu posto e o dedicado á venda de viño só abren durante os fins de semana.
O negocio de Marta Santiago, A Fervella, mantívose aberto desde que se aliviaron as restricións. "Empecei o 10 de xuño e ata agora. Sabía que se pechaba non volvería sacar isto adiante. Ademais, a xente respondeu moi ben. Sabía que tiña moitos clientes que deixarían de contar co meu servizo. Quedei soa aquí", indica.
O espazo de Marta, dedicado á comida tradicional, contou cunha clientela fiel e fixa durante a crise sanitaria. "Os pontevedreses apoiáronme. Foi grazas a moita xente que traballaba nas obras, albaneis e empregados de oficinas. Dei para comer a moitos obreiros e a empregados de bancos", sinala.
Esta concesionaria do gastroespacio, que dispón de servizo de repartición a domicilio, cre que a verdadeira crise que provocou o coronavirus está por chegar. "Vai chegar agora, coas declaracións (da Renda) e cos ERTE", puntualiza.
Afonso Díaz, da Merluzateca: "Abrín o venres. Empezamos moi contentos e con forza. Este é o maior espazo ventilado da provincia. Aquí a xente pode estar máis tranquila"
1 DE XUÑO. O Mercado, que é o nome oficial que recibe o gastroespazo, conta con 42 casetas. A metade delas, 21 en total, foron adxudicadas a emprendedores que apostaron por distintas propostas gastronómicas. As 21 restantes, e as novas vacantes, deberán saír agora a poxa.
A primeira planta do Mercado abriu con 13 concesionarios o 22 de agosto de 2019. Dous deles, A Polbería e Filamento, dedicados á comercialización de polbo e a venda de vermús e cócteles, respectivamente, pecharon as súas portas de forma definitiva.
O gastroespazo aínda non funciona ao cento por cento. Algúns establecementos non abrirán ata o próximo 1 de xuño. Entre eles figuran Na Póla, especializado en hamburguesas e fingers de polo.