O gastroespazo do Mercado terá terraza exterior. Así o confirmou este luns a concelleira de Espazos Públicos, Eva Villaverde, durante a rolda de prensa posterior á Xunta de Goberno local, na que avanzou que o Concello permitirá a instalación de veladores na Rúa Serra para dinamizar os locais de hostalería da primeira planta da Praza de Abastos.
O que aínda non transcendeu é cantas mesas e cadeiras colocaranse fóra do edificio municipal. Villaverde asegurou que os técnicos ultiman o informe para a distribución do espazo e o número de terrazas permitidas.
A iniciativa prodúcese tras a petición dos concesionarios da parte de arriba do Mercado, que viron diminuídas o número de mesas no interior da instalación por cuestións de seguridade sanitaria. O aforamento no interior do local reduciuse ao 40%, o que obrigou a retirar varios asentos.
O Concello asegura que a medida se produce no marco do aumento do espazo para veladores que se permitiu noutros negocios de hostalería na cidade. O gastroespazo do Mercado reabriu as súas portas o martes pasado entre estritas normas de hixiene e seguridade. Seis dos doce postos retomaron a súa actividade a semana pasada.