A Vía Verde entre a capital e Vigo situouse na liña de saída dos asuntos que o Ministerio de Transportes quere despexar canto antes. Non en balde, da súa decisión sobre o destino das vías ferroviarias xa en desuso depende a posta en marcha dun proxecto tan demandado como ilusionante: unha senda peonil e ciclista que, aproveitando os tramos xa en construción, nacese en Vilagarcía e chegase ás portas da cidade olívica.
A carteira que dirixe José Luís Ábalos traballa xa nun plan para reaxustar o mapa ferroviario galego, que inclúe resolver o destino final dos tramos de vía que quedaron nun segundo plano coa entrada en funcionamento dos novos trens. A súa intención é dar unha solución global e non dar unicamente solucións puntuais, como sería o caso da Vía Verde pontevedresa.
A cuestión radica, basicamente, en se o Goberno aproveitará ou non os vellos trazados para derivar o transporte de mercancías cando coincida co de viaxeiros. Unha especie de carril lento, que permita levar ás beiras os vagóns máis pesados e non lastrar os tempos das novas liñas.
Larriba: "É unha reivindicación compartida polos cidadáns e os alcaldes, e por parte de Adif non hai problema en ceder as vías"
O asunto está moi presente nos despachos do Ministerio, sobre todo grazas ao interese que espertou na Subdelegación de Pontevedra, non só por atender a demanda cidadá, senón polo seu encaixe na política ambiental que vén promovendo o gabinete de Maica Larriba. De feito, a finais do pasado ano houbo unha nova consulta sobre esta cuestión e Madrid tomou boa nota do empeño.
A subdelegada, Maica Larriba, indicou nunha recente entrevista con Diario de Pontevedra que Adif xa deixara clara a súa renuncia a utilizar as vellas vías e que, xa que logo, a decisión era de Transportes, que solicitara tempo.
Ata agora, o argumento para non resolver a incógnita fora que ter un Goberno en funcións durante case dous anos impediu tomar decisións de calado. Liquidada esta barreira, o compromiso agora é revisar canto antes as vías que quedaron en desuso e definir o seu destino da forma máis eficaz posible. Aquelas que os técnicos consideren inoperativas cederanse aos concellos que as reclamen para reconvertelas en sendas peonís ou espazos de lecer.
Aínda que o asunto continúa en revisión, a intención do Goberno Sánchez é resolvelo "canto antes", sempre dentro da presente lexislatura.
Lores: "Pontevedra aposta claramente pola Vía Verde. O transporte de mercadorías pode utilizar outros tramos ferroviarios"
A reconversión das vellas vías do tren en Vía Verde púxose sobre a mesa desde Pontevedra nada máis coñecerse a reestruturación ferroviaria. O propio alcalde mostrouse encantado co proxecto e urxiu no seu momento a Adif para que as cedese sen dilación.
De momento, xa conta co visto e prace para utilizar a vella ponte do tren sobre o río Lérez, en Monte Porreiro, para unirse con Portas a través dunha senda verde. Un trámite que quedou resolto a mediados de 2018.
Os traballos están avanzados en Caldas, Portas e Vilagarcía: en abril adxudicáronse os traballos a Tragsa, con achegas de Deputación, Xunta e concellos
Resolta a conexión polo norte, tan só queda dilucidar o futuro dos 32 quilómetros da antiga vía férrea que une a capital con Vigo. O antigo Ministerio de Fomento cedeu a Vigo o tramo que discorre desde a estación de Urzáiz ata Chapela (Redondela) e xa se construíu un pequeno tramo de senda peonil e ciclista, que usan miles de cidadáns.
O obxectivo é repetir algo similar pola liña ferroviaria en desuso entre Pontevedra e Arcade, e innovar unha solución paralela entre Arcade e Chapela, pois este tramo de vía continúa utilizándose para o transporte de viaxeiros.
De levarse a cabo esta senda, enlazaría coa que xa se constrúe ao longo de Vilagarcía, Caldas e Portas, o que daría lugar á primeira gran vía verde galega.