Aínda que Ence continúa sentíndose "ameazada" pola Lei de Cambio Climático e a súa posible reatroactividade sobre a prórroga de 60 anos que o Goberno de Rajoy deixou aprobada en 2016 e que segue en cuestión por parte do Goberno, o Ministerio de Transición Ecolóxica trasladou formalmente á empresa que "en ningún caso" se aplicará con carácter retroactivo sobre esta prolongación da concesión.
É máis, fontes próximas á ministra Teresa Ribeira revelaron que ela mesma trasladou ao presidente da pasteira, Ignacio de Colmenares, a decisión do Goberno de "acatar" a sentenza da Audiencia Nacional sobre os recursos presentados polo Concello de Pontevedra, a APDR e Greenpeace. Non hai intención de recorrer a decisión dos xuíces por parte do Executivo de Pedro Sánchez e así llo fixeron saber á empresa uns días antes da xunta xeral de accionistas que Ence celebrou o pasado venres.
O propio Colmenares, durante esa importante cita anual dos socios da empresa, baseou as referencias ao complexo industrial de Pontevedra na decisión de seguir dando a batalla nos xulgados para defender a súa prórroga, que a empresa considera que ten vixencia ata 2073.
En medios próximos ao conselleiro delegado de Ence sinalan que a compañía cre posible que a Audiencia Nacional emita a súa decisión sobre os recursos antes do verán. En realidade, a sentenza tería que haberse ditado no último trimestre do 2020, pero a evolución da pandemia e as restricións atascaron o traballo dos xuíces, que acumulan un atraso de case seis meses sobre os calendarios previstos inicialmente.
Teresa Ribera: "O Ministerio non ten intención de variar o texto da Lei de Cambio Climático, pero non terá efecto retroactivo sobre Ence"
Nese recurso, a Avogacía do Estado achandouse e deixou unicamente en mans de Ence a defensa da prórroga en Pontevedra. O caso podería ser recorrido ata o Tribunal de Estrasburgo por calquera das partes, pero o Goberno non ten intención de facelo.
O que tampouco fará o Ministerio de Transición Ecolóxica, e así llo fixo saber tamén a Ence, é modificar o texto da Lei de Cambio Climático que en abril entrará no Congreso para a súa aprobación inicial. O Goberno defenderá a súa posición no polémico artigo 18.4, onde o tempo verbal utilizado deixa no aire se se utilizará esta lei, que limita en todos os casos a un máximo de 75 anos as concesións na costa, para tombar prórrogas que excedan esta temporalidade. Medio Ambiente quere ter esta ferramenta na súa man, pero sinala que non para aplicar no caso de Ence (onde decidirá a Audiencia Nacional) senón noutros asuntos que seguen aínda en discusión e sobre os que, ao parecer, si cabería facer valer esta nova lei.
