O Graneiro de Amelia, a empresa nada hai oito anos en Pontevedra cun forte aposta pola venda a granel de produtos alimenticios, expándese en plena crise coa apertura de dúas novas tendas en Palma de Mallorca e Majadahonda (Madrid). Son as súas primeiras franquías fóra das fronteiras galegas, baixo a marca Granalia. é a terceira firma do agora grupo, baixo cuxo paraugas se acubillan tamén O Graneiro, o herbolario Sra. Florinda e Spain Bulk Quality, "a distribuidora nacional que achega aos produtores locais ás grandes cidades", explica Edgar Ramírez, un dos fundadores do Graneiro de Amelia xunto a Marcos Otero. Spain Bulk xestiona tamén a tenda online.
As dúas novas aperturas en territorio español súmanse aos doce establecementos en Galicia, situados nas grandes cidades e vilas medianas e a súa filosofía, do mesmo xeito que a das primeiras tendas, baséase na venda de produtos naturais e en levar "os antigos ultramarinos, modernizados, ao centro das cidades", como os que se atopan en Loureiro Crespo ou Riestra, en Pontevedra.
Aos dous Granalia podería sumarse a curto prazo Sra. Florinda, "pois ten moita demanda".
A acollida en Palma e Majadahonda está a ser moi boa. "Mantemos a esencia galega nos locais, na estética, con produtos como albariño, mencía ou conservas das Rías Baixas... Hai moito galego por alí que mesmo emociónase".
Ramírez apunta que a pandemia do coronavirus trastornou os plans iniciais, aínda que non influíu definitivamente no bo devir da aventura. "Estaban para abrir en marzo, xusto a fin de semana que se decretou o estado de alarma. Retrasou as aperturas, que finalmente foron en maio".
En todo caso, son exemplo dunha empresa que, en plena pandemia, non só non pechou senón que abriu novos locais.
"O proxecto levaba xestado moito tempo e non podía ir para atrás", feito ao que se suma que "tampouco vemos que o estado de alarma sexa un problema para nós. A xente vai seguir tentando comer san e manter a liña. E nós cremos que somos unha empresa sólida para seguir adiante sen problema", destaca.
MEDIO AMBIENTE. A filosofía do coidado polo medio ambiente é a peza crave do proxecto e oito anos despois Ramírez considera que "si cambiamos moito a filosofía de compra da xente, fomos pioneiros en Galicia e notamos que a xente demanda cada vez máis, pero queda moito por percorrer" na loita contra o plástico e materiais dun só uso. "Somos conscientes diso, de que é inevitable que se estea utilizando máis plástico, pero volveremos á normalidade, a intentar que se reduza o máximo posible".
As medidas de hixiene e seguridade xa eran habituais nas súas tendas, aínda que agora "adaptámonos a todas as indicacións" de Sanidade. Durante o confinamento si se notou un bajón de clientes. "A xente tiña moito medo. Case todos os nosos locais están nos cascos vellos, en pleno centro turístico, e a demanda baixou, porque había que ir o súper máis próximo". Aínda así, confesa, "temos clientes habituais que escapaban da súa zona para virnos comprar. Aí decátaste de que o estás facendo ben" e que a súa filosofía e os seus produtos non se atopan en calquera establecemento convencional.
