O Concello explicouno cando anunciou a medida: non é posible desenvolver a tradicional tirada de lumes masiva polas restricións impostas por mor da pandemia. No seu lugar, o goberno local optou por tiradas de apenas cinco minutos ao longo de toda a semana e, o que é máis rechamante, en lugares que ninguén coñece.
A proposta levantou inicialmente suspicacias entre o público, habituado a un espectáculo único, máis longo e moi rechamante. De feito, os fogos de artificio eran sempre un elemento central das festas.
No entanto, logo da primeira xornada, na que a contorna da Alameda foi o elixido para o lucerío, a opinión da xente foi cambiando e este domingo esperábase xa con certa expectación a zona oculta na que o Concello prepararía a segunda tirada. Finalmente ocorreu na Praza de Barcelos, onde de novo se sorprenderon os veciños da contorna.
