O conflito pola delimitación dos lindes con Verducido xerou un cisma na Comunidade de Montes de San Vicente de Cerponzóns. Un grupo de integrantes deste colectivo (entre os que se atopan membros do anterior equipo directivo) reprocha á actual xunta reitora que non respecte o principio de acordo que alcanzaran ambas as entidades nas negociacións que mantiveran no seu día e que, aseguran os críticos, só estaba pendente de ratificación por parte das respectivas asembleas.
Neste sentido, indican que a anterior directiva da Comunidade de Montes de Cerponzóns efectuou en 2015 os traballos de deslinde con máis de 200 propiedades particulares. Afirman que "foi sinxelo chegar a un acordo porque a inmensa maioría das parcelas privadas estaban delimitadas mediante muros".
Os críticos engaden que para delimitar a liña divisoria entre os terreos comunais de Cerponzóns e Verducido, membros de ambas as xuntas reitoras reuníronse en máis dunha vintena de ocasións no propio monte para efectuar os traballos de campo e chegar a un consenso sobre os lindes.
"Acordamos efectuar o deslinde en base a unha liña recta fixando como referencia as mouteiras que localizaramos (algunhas desapareceran) e a devasa de Monte Redondo, situado xunto á canteira explotada no seu día pola empresa Holcim", subliñan portavoces do grupo de comuneiros de Cerponzóns que expresan o seu desacordo coa forma na que a actual directiva está a xestionar o asunto que, en caso de non chegar a un entendemento, a Comunidade de Montes de Verducido ameaza con levalo ante os tribunais para que sexa a xustiza a que dirima o litixio.
Os comuneiros críticos de Cerponzóns consideran que a actual xunta reitora debería convocar unha asemblea para dar explicacións sobre o "cambio de rumbo" que deron as negociacións e que, ao mesmo tempo, provocaron unha deterioración nas "magníficas relacións" que tiñan ambas as entidades parroquiais.
Engaden que na mesma reunión a directiva debería aclarar outras cuestións, entre elas "¿por que se tallaron miles de piñeiros en Campo dos Bois o ano pasado e regalouse a madeira no canto de vendela, cando as árbores eran patrimonio da Comunidade de Montes?" e "¿quen autorizou unha talla de carballos no núcleo de Meán, que pertencían aos comuneiros". Ademais, os críticos queren saber cal foi o destino dos bancos de madeira da Casa do Pobo (que pertencían aos comuneiros) nos que sentaban as persoas que acudían ás asembleas que se desenvolvían neste local social.
"As directivas de Cerponzóns e Verducido sempre se levaron moi ben e mantiveron unha relación moi cordial e de colaboración ata que tivo lugar a substitución na xunta reitora de Cerponzóns, formada por persoas que, na súa maioría, proceden de fóra da parroquia e algunhas outras aínda non naceran cando moitos de nós xa estabamos a traballar para pór en valor o monte comunal", subliñan representantes do grupo crítico que, en todo caso, aínda manteñen a esperanza de que a actual directiva "recapacite" para reconducir as negociones e alcanzar un acordo amigable que evite que o deslinde chegue ao xulgado porque, advirten, "corremos o risco de non ter realizado o deslinde que resulta obrigatorio para o plan de ordenación do monte que deberemos aprobar antes de 2020".
En caso de non chegar a un acordo nos lindes, o presidente da reitora de Verducido, Marcos Rey, advirte de que "se Cerponzóns obríganos a ir ao xulgado e meternos nun proceso que nos suporía un gasto de 8.000 euros iriamos a por todas".
