Actores como Cayetana Guillén Cuervo, Eva Isanta, Juanjo Artero ou Nancho Novo subiranse ao escenario do auditorio de Afundación en Pontevedra entre os meses de outubro e decembro na tempada de Teatro que organiza a obra social de Abanca na Boa Vila e en Vigo.
Conscientes da situación sanitaria actual, desde Afundación tomáronse todas as medidas necesarias para garantir que o público poida gozar da cultura de forma segura. Deste xeito, para reducir o aforo dos espazos e que se poida manter a distancia de seguridade establecida, suspendeuse a venda de abonos, polo que só se poderán adquirir entradas individuais na web Ataquilla.com a medida que se poñan á venda.
OBRAS. A produción Losers será a encargada de abrir a tempada o día 27 de outubro en Vigo e ao día seguinte en Pontevedra. Unha obra protagonizada por Jon Plazaola e Aitziber Garmendia na que interpretan a dous personaxes que roldan os corenta anos e non teñen nada do que se supón que deberían ter coa súa idade.
A seguinte obra en saír a escena será Portas abertas, con Cayetana Guillén Cuervo e Ayoub El Hilali. Unha intriga teatral ambientada na cidade de París en pleno atentado terrorista que se poderá ver o 5 de novembro en Vigo e o día 8 en Pontevedra.
Trigo Sucio, con Nancho Novo, Eva Isanta, Norma Ruiz e Fernando Ramallo, poderase ver o 10 de decembro en Vigo e o 11 en Pontevedra. Juan Carlos Louro dirixe esta montaxe de David Mamet, unha obra sobre o acoso sexual inspirada no caso de Harvey Weinstein.
Finalmente pechará a tempada Un marido ideal, unha peza orixinal de Óscar Wilde, versionada por Eduardo Galán e interpretada, entre outros, por Juanjo Artero e Antea Rodríguez. Poderase ver o 16 de decembro en Vigo e ao día seguinte en Pontevedra.