A recesión suscitada pola crise sanitaria da covid-19 non tardou en deixar a súa pegada no ámbito financeiro. A destrución e paralización de emprego marcou un punto de inflexión na concesión de hipotecas, lastrando os bos datos cultivados nos primeiros meses do ano.
Segundo cifras publicadas este mércores polo Instituto Nacional de Estadística (INE) a provincia de Pontevedra rexistrou en marzo un esborralle das hipotecas do 35% respecto ao mes anterior, pasando das 626 materializadas en febreiro ás 409 contabilizadas en marzo, mes no que se decretou o inicio estado de alarma.
O balance, que tamén denota o descenso de actividade en notarías (nas que se reduciron horarios e aplicado Erte), reflicte que a compravenda de activos inmobiliarios viuse seriamente prexudicada pola pandemia. O 71% das hipotecas concedidas correspóndense con vivendas, o que fai presupor que a maior parte das que non se asinaron tamén corresponden a esta categoría. Para ser máis exactos, en marzo asináronse na provincia 293 hipotecas de vivendas, un 24% menos que as formalizadas en febreiro (388) e un 33% menos das que se cuantificaron en xaneiro (437).
FUTURO. O valor das propiedades hipotecadas tamén sufriu un importante descenso. Se en febreiro as hipotecas tramitadas na provincia superaban os 90 millóns de euros, as de marzo quedaron rozando os 50 (un 45,5% menos). E se un estreita o cerco ao campo das vivendas, sucede outro tanto do mesmo. En febreiro as casas e pisos hipotecados arroxaban un valor de 40,2 millóns de euros, o que implicaba un importe medio de 103.804 euros por vivenda. As comercializadas en marzo quedaron nos 31 millóns, o que implica un valor medio (algo superior) de 106.006 euros.
A actividade económica foi remontando desde entón, pero o certo é que as perspectivas de futuro non son moi prometedoras. Na Enquisa sobre Préstamos Bancarios (EPB) que publicou en abril o Banco Central de España (BCE) faise fincapé en que as entidades bancarias "anticipan un retroceso intenso da demanda de financiamento procedente dos fogares, tanto para adquisición de vivenda como para consumo e outros fins", debido " deterioración das perspectivas económicas e o aumento da incerteza". A baixada destes préstamos no segundo trimestre incluso podería estar "próxima á maior caída observada, que tivo lugar nos meses seguintes ao comezo da crise" de 2008.
