A intención da Xunta é aprobar o novo protocolo a próxima semana, aínda que a súa aplicación poida demorarse algo máis. á espera de que esta se produza, moitos hostaleiros ansían xa poder servir outra vez consumicións para tomar nas barras dos seus negocios.
"Nós traballabamos bastante na barra, así que todos estes meses que non puidemos facelo botámolo de menos. Se se permite outra vez esa posibilidade, será positivo", explicaba este xoves David, camareiro na cafetería Don José de Pontevedra.
Precisamente, as cafeterías, bares e vinotecas serán os establecementos máis afectados por esta medida e non tanto os restaurantes que serven en mesa. No entanto, tal e como indicou Rubén González, responsable de El Cafetín, "aínda que depende de cada tipo de negocio, todo o que sexa irnos achegando á normalidade, será positivo para todos e é ben visto por parte de todos".
En palabras súas, o non poder servir en barra desde hai case un ano foi unha de tantas outras medidas ás que os hostaleiros tiveron que adaptarse. "En El Cafetín, antes da pandemia a barra funcionaba principalmente na gastroteca para persoas que se tomaban uns viños sen cear ou comer en mesa e tamén na cafetería. Iso tivemos que deixar de facelo cando se prohibiu e, como todos, fómonos adaptando ás restricións que se foron aprobando. Agora trátase de volver á normalidade canto antes, así que, se aos poucos ímonos achegando a ela, benvido sexa".
En todo caso, máis aló de poder servir outra vez consumicións na barra, os hostaleiros ansían aínda máis poder ampliar os aforamentos nos seus establecementos. Así o explicou Eva Rey, da cafetería Osiris na rúa Loureiro Crespo. "É bo ir regresando á antiga normalidade. Ter a posibilidade da barra está ben, porque é algo que funciona bastante, sobre todo cos cafés rápidos. Tamén é máis cómodo para nós como profesionais, porque podes servir máis rápido e sen andar tanto. Ter que levar as consumicións ás mesas obrígache a facer uns percorridos maiores e é máis canso. En todo caso, a barra non condiciona tanto o funcionamento dos locais como o aforamento interior. Iso si que restrinxe moito máis o noso traballo", sinalou esta profesional do sector.
No protocolo que está a negociar a Xunta tamén se contempla modificar as condicións vixentes para os aforamentos. Segundo explicou esta mesma semana o conselleiro de Sanidade, Xullo García Comesaña, a nova normativa permitirá que o aforamento dos locais non dependa da situación epidemiolóxica dos municipios. En todo caso, aínda están sen pechar as regras que se aplicarán a partir da súa aprobación.
