Tras coñecer as novas restricións da Xunta en materia de covid-19 os hostaleiros dixeron "ata aquí". Consideran que "nin temos autoridade legal para validar documentos sanitarios nin para pedirlle á xente que se identifique".
Así o manifestou este xoves a presidenta de Hosfega, a Federación de asociacións de hostaleiros galegos de recente creación que aglutina a trece colectivos de Galicia, entre eles Hoempo. Elena Vitoria, que tamén é vicepresidenta do colectivo de hostaleiros que representa a Pontevedra, Marín e Poio, explicou que Hosfega presentou por rexistro un escrito no que demandan ao Goberno galego que controle o cumprimento da nova normativa de acceso aos locais de hostalería.
"Nós o que pedimos é que reconsideren as últimas medidas. Non estamos dispostos a levar adiante o control do acceso aos locais porque non somos autoridades sanitarias de ningunha clase, e ademais hai que ter en conta o estado en que nos atopamos que estamos sen persoal", manifestou
A presidenta de Hosfega valorou positivamente que por fin se recoñeza que o problema está nas reunións privadas e non na hostalería" e aclarou que os empresarios non están en contra de que se esixa un certificado de vacinación ou unha PCR negativa para acceder ao interior dos locais. "Pero nós non temos como controlalo", dixo Vitoria. Consideran ademais os empresarios que esa acreditación tamén se debería esixir no transporte público, as grandes superficies de alimentación ou os comercios.
"¿Quen somos nós para discernir que isto é auténtico? Hai picaresca, ¿que formación temos para identificar que eses documentos son auténticos? Para iso, segundo a lei, deberiamos ser declaradas autoridades sanitarias", reclamaron.
"Os espazos hostaleiros son seguros e a hostalería é garante do cumprimento das normas", reivindicou Hosfega no escrito remitido á Xunta, no que a federación incidiu en que as restricións vixentes "fan inviable" o sector.
As novas restricións aprobadas o pasado martes pola Xunta a instancias do comité científico entrarán en vigor este mesmo fin de semana e afectarán a un total de 36 municipios da comunidade que se atopan nos niveis máximo ou alto de alerta por covid. Ademais dos controis na hostalería, limitan as reunións de non convivientes a un máximo de seis persoas no interior e dez no exterior.
