A ampliación de horario e aforamento supoñen "un lixeiro alivio" para a hostalería

A partir deste venres, festividade de San José e Día do Pai, o horario de apertura da hostalería amplíase das seis da tarde ás nove da noite, con aforamentos que no nivel máis relaxado de restricións (como é o caso do municipio de Pontevedra) chegan ao 50% no interior e 75% no exterior dos locais. Esta decisión enmárcase no contexto da desescalada en Galicia ante a pandemia da covid-19.

"Empezamos a ver a luz ao final do túnel", sinala Jacobo Barragáns, portavoz da Plataforma de Afectados Covid Pontevedra (PAC), mentres que Daniel Lorenzo, presidente da Asociación de Hostaleiros de Pontevedra (Hoempo) bota en falta unha maior flexibilización no horario de peche dos locais, ademais de reivindicar un cambio no criterio polo que se rexe o cálculo do nivel de ocupación máximo dos establecementos.

Neste sentido, Daniel Lorenzo (Hoempo) explica que non acaban de entender que o aforamento máximo dos locais estea baseado nunha porcentaxe das mesas no canto de contabilizar o número de cadeiras. "Cremos máis nas distancias, con polo menos 1,5 metros entre cadeiras porque, desta forma, non se formarían aglomeracións na espera para ocupar unha mesa". 

Considera que a ampliación do horario (das seis da tarde ás nove da noite) suporá "un pequeno alivio" para a situación na que se atopa o sector hostaleiro, pero que non será suficiente para os establecementos que ofrecen tapas e serven ceas que "seguirán perdendo a quenda de noite". "O ideal sería que o horario se ampliase ata as once da noite", subliña Daniel Lorenzo.

Neste sentido, o portavoz de Hoempo considera que se se permitise traballar á hostalería ata as once da noite repartiríase a clientela entre as comidas e as ceas. "Agora estámonos xuntando todos á hora das comidas e antes e logo das mesmas. Esas aglomeracións evitaríanse ampliando o horario da quenda de noite". 

Ademais, Daniel Lorenzo apunta que fixar o horario de peche da hostalería ás nove da noite impedirá que moitas persoas que saen de traballar a esa hora (incluso media hora máis tarde, como o persoal de supermercados ou centros comerciais) poidan gozar dunha consumición antes de regresar ás súas casas ao finalizar a xornada laboral.

RESPONSABILIDADE. Jacobo Barragáns (PAC) apela á responsabilidade da xente para evitar que os hostaleiros teñan que volver pagar "os pratos rotos", que se traduciría nunha volta atrás co endurecemento das restricións ou incluso o peche dos locais. "Poremos todo da nosa parte para que todo transcorra con normalidade", subliña

Segundo o portavoz da Plataforma de Afectados Covid, a ampliación do aforamento (pasarase do 30% actual ao 50% no interior e do 50% ao 75% no exterior) e de tres horas no horario de peche, "aínda que non nos permitirán volver ao nivel de actividade de antes da pandemia, será un pouco máis sostible, aínda que non pasaría nada se no canto de establecer o peche ás nove da noite fose ata as nove e media (de forma que se respectaría o toque de queda fixado para as dez da noite)". 

"Os hostaleiros temos algo máis de alegría: a partir do venres a xente que sae de traballar ás sete ou sete e media xa pode ir a un local a tomarse unha caña ou un café. Xa podemos pór en marcha a quenda de tarde". 

Jacobo Barragáns considera que a ampliación do horario no sector hostaleiro "sacará a moita xente do pozo no que caeron coa pandemia, incluso a traballadores que se atopan en ERTE".