Unha persoa celíaca gasta de media 934,69 euros máis ao ano na cesta da compra que unha persoa que consome produtos con gluten, sendo o pan rallado, as madalenas e as galletas de chocolate os alimentos que maior diferenza presentan.
Ademais, este custo a maiores é asumido polo colectivo celíaco sen ningún tipo de axuda, bonificación, nin subvención estatal, a diferenza do que ocorre noutros países da Unión Europea. "Hai produtos nos que se chega a superar o 100% do seu valor, e non só non temos axudas, senón que ademais pagamos o IVE de produtos dietéticos, é dicir, un 21%", explica Gloria Bernárdez, da Asociación de Celíacos de Galicia (ACEGA).
A esta problemática súmanselle tamén as dificultades que atopan as persoas que consomen produtos sen gluten cada vez que van comer ou a cear fóra de casa. Actualmente, na provincia de Pontevedra hai 54 restaurantes rexistrados en ACEGA, unha cifra que se reduce a 9 na cidade de Lérez. Doutra banda, a colectivo conta a día de hoxe con 735 socios na provincia, 71 na Boa Vila.
"Antes a poboación celíaca representaba ao redor do 1% do total da cidadanía española e agora rolda case ou 2%. Iso é porque agora desconfíase máis e diagnostícase máis". En canto a ACEGA, "actualmente contamos con preto de 2.000 socios en toda Galicia e a provincia de Pontevedra congrega case a metade deles, pero sen dúbida, aínda queda moito por facer porque, de feito, a cidade de Pontevedra é, dentro grandes cidades galegas, a que menor restauración sen gluten ten", confirma Gloria Bernárdez.
CHARLA. Co obxectivo de que os celíacos sexan tomados máis en conta no sector da hostalería e da restauración, o Mercado de Abastos de Pontevedra acolleu onte unha charla organizada pola ACEGA en colaboración coa Concellería de Promoción Económica e Turismo e enmarcada dentro do Proxecto Galicia Sen Gluten.
A actividade estivo dirixida por Nuria Colmenero, do departamento de Restauración e Seguridade Alimentaria da ACEGA. "Na charla explicamos como elaborar un menú sen gluten de forma segura, como evitar contaminación cruzada en cociñas, como utilizar todo o que hai en cociñas sen que poida haber contaminación e o coidado que hai que ter coa roupa de traballo. Ademais, explicamos tamén aos hostaleiros o convenio que temos dende a ACEGA para que os empresarios deste sector poidan ter o noso selo", explica Colmenero.
Un dos principais problemas á hora de elaborar un menú sen gluten e manipular os alimentos nun restaurante é a contaminación cruzada. De producirse, as secuelas poden ir "dende un lixeiro dor de barriga ata náuseas, dermatitis herpetiformis e, en casos severos, shock anafiláctico".
En canto aos erros máis comúns que se cometen nos restaurantes galegos destacan, por exemplo, "utilizar o mesmo utensilio sen lavalo antes, utilizar os mesmos aceites para fritir ou botarse as mans a un mandil cheo de fariña. Outra das cousas que máis repítese ten que ver cos saleiros. Normalmente os cociñeiros teñen un mesmo saleiro para todo e non caen en que eles, cando collen o saleiro, non sempre lavan as mans previamente. Para evitar problemas, deberían ter dous saleiros diferentes", asegura a portavoz do departamento de Restauración de ACEGA.
Para a Asociación de Celíacos de Galicia é fundamental que se sigan facendo este tipo de charlas porque "é algo totalmente gratuíto e o único que queremos é concienciar á sociedade e aos hostaleiros. Cada vez hai máis alerxias e intolerancias e temos que empezar a facer as cousas un pouquiño mellor. Ademais, detrás dunha persoa celíaca hai unha familia e uns amigos e se esa persoa non pode comer nun establemento, non van ir".
