A Asociación de Hostaleiros de Pontevedra confía en que "as reservas de última hora" eleven as porcentaxes das que están sobre a mesa, aínda baixas en varios establecementos e concentrados sobre todo neste fin de semana e o seguinte.
O sector evita vincular directamente estas cifras co conflito da iluminación do Nadal e advirte de que esta ponte non é precisamente favorecedora, ao caer os dous festivos da Constitución e a Inmaculada no medio da semana. Con todo, non poucos hostaleiros da cidade cren que "se se acendesen as luces, quizais viría máis xente de visita". "Moitos compañeiros consideran que a iluminación chega tarde e eu non digo que non haxa que recortar gastos enerxéticos, pero pensamos que a iluminación funciona como un incentivo, non só para o turismo, senón tamén para as vendas en xeral e o consumo", indicou este martes Paula Lourido, presidenta da entidade.
Sorpresa nos turistas
Aos propios turistas que se moven estes días pola capital e que non están ao tanto do conflito das luces "chámalles a atención que aínda non haxa adornos", e o sector presume que aos que chegarán na ponte "vailles a sorprender moito máis". "Nos últimos anos moitos dos clientes que tivemos nesta ponte viñan de rebote de Vigo, porque alí non quedaba sitio, e quedaban sorprendidos co bonita que estaba Pontevedra. Agora cando veñan e vexan que non hai iluminación, posiblemente lles chame a atención", engadiu Lourido.
Nos pisos turísticos o nivel de ocupación é máis elevado, aínda que concentrado nas cidades e sobre todo naqueles núcleos urbanos máis próximos a Vigo, onde un ano máis se volve a percibir o tirón da iluminación da cidade olívica.
Pisos turísticos
No caso da cidade de Pontevedra, a presidenta da Asociación de Vivendas Turísticas de Galicia, Dulcinea Aguín, informou este martes de que para esta ponte están reservadas un 63% das prazas e de que, á espera de coñecer onde chegarán as contratacións de última hora, o negocio pode acusar a tardanza coa que se acenderán as luces de Nadal.
E non só no que a turismo se refire, senón tamén a nivel comercio: "Decembro é un mes moi importante para a hostalería e o comercio e cando tes unha contorna iluminada é máis atractivo. Creo que o Concello de Pontevedra debería meditar, porque nos parece moi ben que se fagan medidas de aforro enerxético, pero tamén hai que ver o retorno que produce para o resto do tecido socioeconómico. Moita xente aproveita estes días para facer as compras e se o espírito do Nadal non acompaña quizais se vaian a outra parte. Pontevedra é unha cidade moi atractiva para visitar, pero honestamente creo que a decisión de atrasar a iluminación é un erro", concluíu Aguinea.
