Unha fotografía antiga revelou que unha das paredes do paraninfo do IES Valle Inclán de Pontevedra podía esconder un mural de gran formato cunha escena marítima baixo a capa de pintura que a cobre actualmente, e xa están en marcha os traballos para confirmar se seque alí e intentar sacalo a luz. O centro conta para iso coas mans expertas da Escola Superior de Conservación e Restauración de Bens Culturais de Galicia.
Foi o director do instituto, Francisco Xosé Suárez Benito, quen contactou con esta no pasado mes de febreiro tras o achado da foto que mostra a pintura, segundo explica a escola a través dun comunicado. As primeiras investigacións situarían o mural nos anos 30 do século pasado. Está no palco, agora baixo unha pintura plástica de interiores.
Así as cousas, os dous centros iniciaron unha colaboración para recuperalo e alumnos que se forman en conservación e restauración de pintura desprazáronse en varias ocasións ao instituto para realizar catas e verificar a existencia da pintura. "Unha vez comprobada a súa presenza, establecerase un protocolo de traballo para recuperar a obra oculta baixo a pintura actual", explica a escola.