"Que diferencia hai entre estar comendo unhas croquetas ou un menú degustación?". Á parte doutras circunstancias, este é o exemplo claro e diáfano que expón o chef Iñaki Bretal para mostrar o seu malestar pola decisión de Sanidade de permitir aos restaurantes estirar desde este venres o seu horario ata as 23.00 horas para servir ceas e vetar esta posibilidade a outros locais que tamén serven comidas, como as taperías, que "cumpren tanto como vos restaurantes".
Á fronte do Eirado da Leña, coa súa flamante Estrela Michelín, Bretal reflexionaba este xoves que "non me parece normal" que poida abrir un restaurante e non unha tapería, "sempre que estea facendo as cousas ben", polo que vería máis lóxico que se permitise a quen cumpra cos aforamentos e outras medidas de precaución fronte á covid-19. De feito, aínda que dará ceas no Eirado ("abriremos, claro, teño que mirar polo meu") non poderá facer o propio coa tapería Loaira. "Non é xusto, hai xente que o está a pasar realmente mal e quen cumpre as medidas debería poder abrir e quen non, leña dura".
A tardía hora á que se publicou o DOG do mércores que incluía a modificación do Plan de Hostalería Segura da Xunta para incorporar as novidades decididas tras o comité clínico do martes, provocou que na mañá do xoves moitos empresarios non tivesen moi claro se poderían alargar o seu horario ou non. Os teléfonos das asesorías botaron fume.
DÚBIDAS COA LICENZA. A decisión tampouco gustou demasiado na Plataforma de Afectados pola Covid de Pontevedra, pois aínda que nos alegramos polos restaurantes, que foron un sector moi afectado ao non poder dar ceas e meréceno, pero é inxusto que taperías e bares que tamén serven ceas non poidan facelo. ¿Cal é a diferenza de estar sentado nun bar ou nun restaurante?", cuestiona Jacobo Barragáns, quen sostén que a hostalería pontevedresa está máis enfocada á opción que deberá seguir baixando o enreixado ás 21.00 horas.
Os establecementos que poden abrir ata as 23.00 horas deben ter o "título municipal habilitante de restaurante", explica o DOG, un termo que suscitou dúbidas entre algúns hostaleiros. O sentir xeral é o de querer facer as cousas ben, evitar que esta medida sirva para que a situación se descontrole e obrigue a dar pasos atrás, pois o obxectivo primordial é chegar o mellor posible á tempada estival.
Ademais desa condición básica, os restaurantes terán que servir ceas sempre con cita previa e levar un rexistro dos clientes que inclúa nome e apelidos, DNI e número de teléfono. Deberán gardalo durante un mes desde o evento para utilizalo nun posible rastrexo.
A terceira cuestión é garantir a correcta ventilación do local mediante a utilización de dispositivos medidores de CO2, nunha zona visible para os usuarios. A concentración non poderá superar as 800 partículas por millón.
O toque de queda ás 23.00 horas condicionará aos clientes, por iso os restaurantes adiantarán o seu horario de ceas
MORATORIA. Para incorporar este aparello os establecementos terán unha moratoria dunha semana. No Eirado, por exemplo, continuarán utilizando estes días un purificador de aire cun sensor que mostra se o ambiente está máis ou menos cargado "e que axuda a orientarnos", explica a súa xefa de sala, Raquel Fernández, mentres xestionan a compra do medidor ideal para este local.
Polo demais, o resto das condicións non lles fará cambiar demasiado o modus operandi. "Desde que abrimos todas as mesas eran con reserva e xa colliamos rexistro dos clientes, aínda que só dunha persoa por mesa, agora será de xeito individual". Iso si, adiantarán media hora a apertura para facilitar que os clientes poidan saír a tempo para non incumprir o toque de queda. O do horario europeo é, de momento, unha utopía.
Isto mesmo opina Giuseppe Verniero, á fronte do Mare e Monti, que este venres tamén servirá ceas. "O toque de queda condiciona aos clientes", que non poderán gozar do banquete sen mirar o reloxo, "pero abriremos xa ás oito, a ver se a xente se anima a vir antes". Neste restaurante italiano xa fai un par de anos" que utilizan o medidor de CO2.
