A plácida mañá dominical na zona da Parda e a Rúa A Estrada, ao leste de Pontevedra, viuse sobresaltada por unha vistosa intervención dos servizos policiais e de urxencias. Ao fío das 13.00 horas, testemuñas alertaban de que se declarou un incendio que, ao parecer, procedía do interior dun galpón anexo a unha vivenda dun inmoble da rúa Alfredo Brañas, en pleno centro da Boa Vila. En vista da manifesta posibilidade dunha propagación cara a zonas habitadas, axentes da Policía Nacional de Pontevedra e efectivos do Parque Municipal da cidade do Lérez despregaron con rapidez un amplo operativo que serviu para que a situación non fose a maiores.
Con todo, testemuñas presenciais explican que foi a intervención de dous ciclistas que viñan de realizar unha desas clásicas rutas matutinas quen, mangueira en man, levaron a cabo as tarefas de extinción no mencionado galpón. As chamas afectaron á propia estrutura da edificación e tamén a un turismo que se atopaba alí estacionado. A participación deses ciclistas resultou moi importante para evitar que o lume se estendese a outros puntos.
Tras a axuda destas persoas, foron os profesionais do Parque Municipal quen, co apoio dos axentes da Comisaría, tomaron as rendas da intervención para pór fin a calquera risco subxacente. O sinistro quedou reducido, así, aos danos materiais no galpón e no turismo.
En canto ao detonante, aínda que non se coñece de forma definitiva, todo apunta a un fallo eléctrico da instalación.
