Un informe municipal avala o uso hostaleiro do sanatorio privado de Santa María. O ditame, que este martes deu a coñecer a concelleira de Urbanismo, Carme da Silva, tras unha comisión celebrada polo seu departamento, é o resultado da consulta dun particular sobre a posibilidade de que o edificio cambie de actividade.
O sanatorio de Santa María abriu as súas portas en 1949 e funcionou como maternidade. En 1999 comezou a ter outros usos sociosanitarios: servizos de longa estancia, convalecencia e residencia privada. O centro, que dispón de 70 camas, foi vendido en 2001 a un grupo catalán. Na actualidade opera baixo a marca Hestia, vinculada a Alliance.
Fontes da compañía aseguraron o martes a este xornal que a súa intención non é a venda do inmoble e que este manterá a súa actividade asistencial. A consulta urbanística debeuse a unha auditoría interna que se encargou para obter o valor real do edificio.
