O número de casos activos na área sanitaria de Pontevedra-O Salnés segue á alza tras rexistrarse 40 novos positivos polo que son xa 308 as persoas que están a tratamento pola covid-19, unha delas ingresada na Uci. De acordo cos datos facilitados o sábado polo CHUP, outros seis pacientes están ingresados en planta, mentres que 301 recupéranse nos seus domicilios. Ademais, segundo puido saber este xornal, nas últimas 24 horas un bebé de seis meses foi diagnosticado con coronavirus. O menor chegou a Urxencias, onde foi sometido a varias probas e confirmouse que estaba contaxiado. Despois foi remitido ao seu domicilio, onde se atopa recuperándose e en seguimento.
No Servizo de Pediatría permanece ingresado desde o pasado xoves outro bebé de mes e medio.
Por outra banda, e sempre segundo os datos que a diario fai públicos o Complexo Hospitalario de Pontevedra, resaltar as 11 altas notificadas nas últimas horas, que deixan un total de 1.022 pacientes curados desde que se iniciou a pandemia. Desde o pasado mes de marzo faleceron por este virus na área sanitaria 18 persoas, a última un home de 79 anos o pasado xoves.
Ademais, nas últimas 24 horas realizáronse 426 PCR, que se engaden ás 29.439 xa efectuadas na área nas últimas semanas.
Por outra banda, o CHUP comunicou que ata o momento non se rexistrou ningún positivo entre os profesores que nos últimos días pasaron polos hospitais da área sanitaria para realizarse as probas serológicas ante o inicio do curso que comeza o próximo día 10.
XIMNASIO EN BARRO. O propietario dun ximnasio de Barro comunicou aos usuarios do centro deportivo que ata novo aviso procedíase ao peche preventivo tras confirmarse un caso positivo na súa contorna familiar. Pese ao incremento de casos, a área sanitaria segue sen facilitar información sobre os concellos afectados polos repuntes.
