A Sección Segunda da Audiencia Provincial de Pontevedra deulle a razón a un narco e retiroulla a un avogado. Esa é a conclusión que se extrae do ditame emitido polo Tribunal tras o xuízo contra o letrado vilagarcián Fernando Silla, denunciado por Guillermo Fernández Sánchez, O Coxo, home de mar vinculado co tráfico de estupefacientes. O motivo, que o primeiro se apropiou, segundo estiman os xuíces, con 40.000 euros que no seu día achegara como fianza para saír de prisión e que foron recollidos polo avogado, "que os incorporou ao seu patrimonio".
Tal circunstancia non foi controvertida no plenario, pero Silla sinalou que eran parte do pago que, segundo el, pactara co seu cliente. O seu argumento non convenceu na Audiencia, que lle condena a un ano e dous meses de prisión, o mesmo tempo de inhabilitación para o exercicio da súa profesión e ao pago de 40.000 euros aos herdeiros da vítima, que, segundo transcendeu en lle xuízo, é a nai do Coxo, a que no seu día achegou os fondos para o depósito.
A sentenza explica que em febreiro de 2009 acordouse a posta en liberdade provisional do citado narco no marco dun proceso contra el previo pago dos 40.000 euros que son obxecto de análise. En 2017, cando a Audiencia Nacional ditou sentenza, o acusado recolleu os 40.000 euros "e quedou coa totalidade da suma", detalla o xuíz.
O avogado dixo na sala que o seu cliente e unha terceira persoa pactaran con el a tarifa de 50.000 euros polo seu traballo en dous procesos penais (incluído este), polo que, defendeu, os 40.000 eran parte do pago, segundo pactaría co denunciante. O narco negou tal acordo. "Esta versión non resulta acreditada", detalla a Sección Segunda.
A Audiencia estima, ademais, que existiu "abuso de confianza" por parte do avogado con respecto á vítima, nai do denunciante. Explica, ademais, que a apropiación indebida dos fondos "ten relación directa coa súa profesión" de avogado, polo que acorda a pena de inhabilitación para a mesma.
Contra a sentenza ditada no Pazo de Xustiza de Pontevedra cabe recurso en fase de casación. O letrado ten a opción de acudir á Sala do Civil e Penal do Tribunal Superior de Xustiza.
