A senadora do PP Pilar Rojo criticou o atraso na licitación do nó de bombeiros, un proxecto longamente esperado e que o goberno de Sánchez incluíu este ano nos orzamentos xerais do Estado, cunha dotación de 2,5 millóns de euros, cantidade suficiente para lanzar o concurso e contratar os traballos. Inicialmente, este novo enlace coa autoestrada ía custar pouco máis de seis millóns de euros. Con todo, o PSOE elevouno ata os 10,2 millóns para mellorar o proxecto e facelo máis ambicioso. A obra ten que licitarse nestes anos para comezar as obras antes incluso de 2022. Segundo a planificación económica dos PGE, o nó de bombeiros tería que estar feito a finais de 2023.
A senadora popular estima agora que seguir atrasando a licitación está pondo o perigo os prazos estipulados polo propio Executivo.
Fai agora pouco máis dun ano, en abril de 2020, o Goberno contestou unha iniciativa parlamentaria de Pilar Rojo sobre esta obra e sinalou entón que o Ministerio de Transportes, Mobilidade e Axenda Urbana incluía a Remodelación do Enlace de Pontevedra Norte da Autoestrada AP-9 (P.K. 129+000), "entre as súas prioridades". Xa entón advertía o Executivo central que se estaba "traballando no pertinente convenio coa empresa concesionaria (Audasa)". Naquela ocasión, o Goberno central era claro respecto ao presunto atraso na obra: "En todo caso -sinalaba a resposta no Senado-, a prioridade absoluta actual do Goberno é a xestión da situación de crise sanitaria ocasionada pola covid-19, para o que se declarou o estado de alarma o pasado día 14 de marzo".
En xuño do 2020 outra resposta seguía insistindo en que a obra é prioritaria, pero sen especificar cando arrincaría o proceso de licitación. E un ano despois, a contestación segue sendo a mesma, só que esta vez existe xa unha consignación orzamentaria que polo menos en teoría debería permitir avanzar na tramitación do proxecto.
Para a senadora popular pontevedresa, "non basta con dicir que se apoia a obra. Como estamos a comprobar, de nada serve que digan que hai orzamento se non hai interese... O que ten que facer o goberno é comprometerse de verdade, e para iso está o B.O.E. Nós pedimos que se licite o nó de bombeiros xa e que podamos velo publicado no Boletín Oficial do Estado. Só así creremos ao goberno".
O proxecto modificaría o escenario viario fronte ao parque municipal de bombeiros, que cederá unha esquina para mellorar a conexión en coche e a pé entre Poio e Pontevedra. A cambio, o recinto municipal onde se gardan os vehículos dos bombeiros gañará espazo no seu parte frontal e permitirá unha reordenación interior do parque.
