O vindeiro luns 25, coa previsible entrada de Galicia na fase 2 do proceso de desescalada do confinamento pola pandemia do coronavirus, os institutos volverán recibir o seu alumnado. Concretamente poderá regresar, sempre voluntariamente, o de 2º de Bacharelato e o de 2º dos graos medios ou superiores de Formación Profesional. No horizonte, apenas dúas semanas de clase presencial con todos os sentidos postos na Abau prevista para xullo. Non haberá exames da terceira avaliación e todos os esforzos enfocaranse á gran proba de acceso á universidade.
Pero para que os mozos poidan pór un pé no centro os equipos directivos levan días adaptando as instalacións para que reunan as máximas condicións de seguridade sanitaria. Todo resúmese nun protocolo acordado pola Consellería de Educación e os sindicatos e que aínda este venres será sometido ao Comité de Prevención de Riscos Laborais.
O departamento que dirixe Carmen Pomar facilita as máscaras ("chegarannos 1.400, unha por alumno e día para dúas semanas", apuntou o director do IES A Xunqueira II, Juan Carlos Pérez) e os elementos de sinalización que deberán usar cando non se poidan manter as distancias de seguridade. Os centros encárganse de adquirir o resto do material (xel hidroalcohólico, dispensadores, luvas, papeleiras de pedal...) e de imprimir a cartelería.
Teñen que seguir unhas pautas de hixiene e separación, non poderán facer círculos nin xuntar pupitres... Veremos cantos seguen vindo
Así mesmo, intensificaranse as medidas de hixiene e limpeza e se desinfectará varias veces ao día.
A actividade é frenética nos institutos, onde sondaxes previas dan idea da cifra de estudantes que acudirán o luns. "Van vir bastantes, ata un 70% dos cen que temos", apunta a directora do IES Valle Inclán, Pilar Freitas. No seu caso están a preparar as aulas da planta baixa para que se poida gardar a distancia de seguridade, "e se temos que desdobrar grupos utilizaremos a biblioteca". Ás clases presenciais sumaranse as telemáticas que impartirá o profesorado non obrigado a asistir, por ser grupo de risco ou estar a cargo de fillos pequenos.
"Os alumnos virán con entusiasmo, pero as circunstancias farán menos agradable" o reencontro. "Teñen que seguir unhas pautas de hixiene e separación, non poderán facer círculos nin xuntar pupitres... Veremos cantos seguen vindo, pois realmente xa están avaliados e a terceira avaliación non vai definir a nota". A primeira lección ao seu regreso será, de feito, un repaso ás obrigacións da 'nova normalidade'.
Impartiranse dúas horas de clase (100 minutos) en dous bloques, intercaladas polos recreos. Neste tempo o alumnado sairá ao patio e o servizo de limpeza realizará a súa tarefa
HORARIOS. No IES A Xunqueira II contan coa asistencia da metade do alumnado convocado, é dicir entre 30 e 40 estudantes. "Temos catro liñas de 2º, así que puxemos as catro aulas non planta baixa e garantimos uns 14 ou 16 postos en cada unha", explica Pérez Mestre. Por se a cifra de alumnado sobe estanse reacondicionando outros espazos, como a aula de música e o Espazo Maker, a biblioteca, o aual de debuxo artístico e o salón de actos, onde o director sinalizou as butacas que poden utilizarse para manter a distancia.
Ademais de colocar o resto de material necesario, adaptouse a ventá de secretaría para que funcione a modo de biombo. E reorganizáronse os horarios. "Impartiranse dúas horas de clase (100 minutos) en dous bloques, intercaladas polos recreos. Neste tempo o alumnado sairá ao patio e o servizo de limpeza realizará a súa tarefa".
A necesidade de desprazarse en vehículo desanima a máis dun alumno procedente de parroquias do rural, como Tomeza ou Marcón, ou da periferia da cidade
A situación é similar no IES Frei Martín
A formulación pasa por adaptar tres aulas para cumprir coas medidas de distancia obrigatorias. "Daríanos ata o 50% do alumnado". No entanto, neste instituto a asistencia non será tan masiva, pois boa parte do estudiantado procede de parroquias do rural, como Tomeza ou Marcón, ou da periferia da cidade, polo que a necesidade de desprazarse en vehículo desanima a máis dun. "Quedan dúas semanas e moitos alegan que por este tempo non lles merece a pena".
Deste xeito, explica Alvariño, quen non acudan presencialmente poderán continuar coas clases telemáticas. "Non vemos factible que sexan simultáneas, por cuestións técnicas, polo que a idea é comprimir horarios e materias para que o profesorado poida seguir cos dous sistemas: vía Webex (plataforma de videoconferencia) no mesmo horario que ata agora, e presencial o resto do tempo".
