Non se sabe quen tiña máis susto no corpo: se os condutores que se atoparon cun grupo de 37 bicicletas circulando pola beiravía da AP-9 ou se os propios ciclistas, alarmados polo forte rebufo dos vehículos que os estaban pasando a toda velocidade. A aventura acabou con final feliz e todo quedou nun soberano sobresalto para os ciclistas, aínda que antes de poder renovar a súa marcha tiveron que facer fronte a unha multa de 500 euros.
Todo comezou sobre as 9.30 horas. Os ciclistas, de nacionalidade polaca, realizaban o Camiño de Santiago pola N-550 e ao chegar ao nó do Pino deixáronse guiar polos indicadores que sinalizaban cara á capital de Galicia (descoñecendo o fondo azul característico das autoestradas) e acabaron na AP-9.
Aínda que o tráfico a esa hora non era especialmente intenso, a súa presenza non pasou inadvertida para os condutores que os adiantaron, varios dos cales deron aviso á Garda Civil de Tráfico. Ademais, dáse a circunstancia de que o grupo tamén foi divisado polos axentes que velan pola seguridade viaria, pois pasaron xusto por diante da Comandancia.
Durante o traxecto, os asustados ciclistas vían como eran adiantados por vehículos a toda velocidade, chegando a temer pola súa integridade física debido ao rebufo que estes deixaban, especialmente os camións e as furgonetas. Desorientados, chegaron a dubidar entre proseguir a marcha ou dar media volta, momento en que foron alcanzados por un vehículo de Tráfico á altura de Campañó, seis quilómetros logo de incorporarse á AP-9.
A comunicación foi especialmente complexa posto que os peregrinos polacos non sabían falar español e manexábanse a duras penas co inglés. No entanto, os axentes conseguiron informarlles de que cometeran unha infracción moi grave porque en España está prohibido circular en bicicleta polas autoestradas e que debían abandonala de inmediato.
Espesa néboa. A espesa néboa da mañá complicou aínda máis a intervención e desaconsellaba a opción máis lóxica: que os ciclistas continuasen ata a seguinte saída da autoestrada, que se atopaba a 9 quilómetros.
Por este motivo, os axentes puxéronse en contacto con responsables de Audasa para efectuar un cambio de sentido. Mentres, os atónitos peregrinos e as súas bicis agardaban na beiravía o desenlace destas xestións.
Ao cabo duns instantes, Audasa e Tráfico coordinaron a arriscada manobra e a comitiva incorporouse ao carril de sentido Vigo, abandonando a autoestrada pouco despois da peaxe. Desde aí continuaron a súa peregrinación cara a Santiago pola N-550, non sen antes facer fronte á inevitable multa. Ao tratarse de cidadáns estranxeiros, a sanción debeu ser abonada no momento, posto que en caso contrario os axentes veríanse obrigados a inmobilizar os vehículos.
Multa de 500 euros. A circulación en bicicleta por autoestrada está tipificada na Lei de Tráfico como unha infracción moi grave, sancionada con multa de 500 euros. Ao facerse o pago no momento, os súbditos polacos beneficiáronse dun desconto do 50%, polo que só abonaron 250 euros. A pesar de que no boletín figuraba o nome do responsable do grupo, o importe foi colleitado a partes iguais polos infractores.
Lonxe de sentirse molestos, os peregrinos acataron a sanción de bo grado, posto que a intervención dos axentes de Tráfico sacáralles dunha comprometida situación que non só puña en perigo a súa integridade física, senón a doutros condutores.
