A Consellería de Medio Ambiente investiga desde o pasado luns o achado de medio centenar de peixes que apareceron mortos na ría, na zona na que se funde co Lérez e co Gafos.
Operarios da Xunta de Galicia acudiron ao momento no que se detectou a mortaldade ao mediodía, tras o aviso de testemuñas dos feitos. Acudiron acompañados de membros da Comandancia da Garda Civil de Pontevedra, en concreto, integrantes do Seprona, que realizaron unha primeira valoración do ocorrido sobre o terreo.
Todos os peixes mortos eran sabogas, unha especie que pode frecuentar o fondo da ría, pero que é principalmente de mar.
As primeiras hipóteses apuntan a que algunha persoa puido depositar na zona aos peixes, dado que non se detectou vertido algún. Ademais, animais doutras especies nadaban coma se tal cousa polas inmediacións.