Non houbo sorpresas de última hora e finalmente a presidencia do Liceo Casino será cousa de dous: o actual mandatario en funcións, Jaime Olmedo, e o aspirante, Alejandro Regueiro.
Ambos formalizaron a súa candidatura dentro dos prazos previstos (Regueiro foi o primeiro en facelo, o venres á tarde e Olmedo o sábado pola mañá) e este luns pechouse a proclamación formal de ambas.
O calendario previsto nos estatutos da entidade contempla que este martes e o mércores se habilite un prazo para as posibles impugnacións e que o propio mércores se realice o sorteo que elixirá os socios que formarán parte das mesas electorais.
Ao día seguinte, o xoves, ábrese a campaña electoral, na que os dous aspirantes defenderán os seus proxectos con uñas e dentes para intentar captar ao maior número de votantes. Será a partir de entón cando cada un dará a coñecer as reviravoltas das súas propostas, para o que disporán ata o día 23. Durante ese mesmo día estará dispoñible en Secretaría a listaxe de socios, para evitar as polémicas que marcaron anteriores comicios internos na sociedade.
O día grande de todo este proceso chegará o venres 28, coa votación, de 10 a 20 horas.
