É un dos dez mozos máis guapos de España, segundo o certame Míster International Spain (o actual Míster España). E é de Cerponzóns. José Andrade Portabales (Pontevedra, 1991), acaba de volver de Oropesa de Mar (Castelló) convertido nun dos dez primeiros clasificados do concurso de beleza masculina e gañador na categoría de desfile en traxe rexional. "Foi un orgullo representar á provincia e foi un orgullo que me premiasen na pasarela co traxe tradicional porque era realmente precioso". Prestáronllo e ensináronlle a poñelo, "que non era fácil", na agrupación O Souto de Rubiáns (Vilagarcía). "Participar no certame foi unha experiencia moi bonita, que me abriu a posibilidade de probar cousas no mundo da moda e a publicidade. Estou realmente moi contento".
Andrade: "Foi un orgullo representar á provincia"
Andrade na praia fluvial do Lérez. BEATRIZ CÍSCAR |
Taekwondista recoñecido agora centrado na práctica dunha arte marcial, o jiu-jitsu, vegano, José Andrade estudaba Dereito na UNED e un máster en nutrición e adestramento persoal, mentres era camareiro no restaurante dos seus pais, cando, a finais do ano pasado, a organización de Míster International Spain contactounoa través das súas redes sociais para proporlle representar a Pontevedra no certame. Nunca antes participara nun concurso deste tipo nin traballara no mundo da moda. E xusto antes de viaxar a Castelló mostrábase prudente respecto diso. "Gústame ir paso a paso. Se as cousas van ben e xorde algo nese sentido, pensareino", dicía en abril. Agora recoñece que o paso polo certame serviulle para gañar confianza neses ámbitos nos que quere probar sorte. "Do que se trata é de aproveitar o momento".
Da experiencia en Míster International Spain queda co compañeirismo que se crea. "Entramos todos como representantes das distintas provincias e saímos como amigos", conta sobre o que foi o mellor do certame. O peor: a tensión. "Sentías unha presión tremenda por chegar a tempo. O día arrincaba ás sete da mañá e xa non parabamos de correr: adestramento, almorzo, compromisos... E todo seguindo as medidas de seguridade pola Covid-19, coas que foron moi estritos".
José Andrade : "Pero a beleza é algo subxectivo. Eu non son o home máis guapo de Pontevedra"
O seu balance final é positivo, a pesar de calquera crítica que poida recibir un certame como este. Nin cre que estean desfasados nin cre que contribúan a fomentar estereotipos de beleza superficiais. "Pero a beleza é algo moi subxectivo. Eu non son o home máis guapo de Pontevedra, simplemente teño unha serie de calidades que me servían para ser míster". Nin sequera concede que a beleza exterior é a que marca a diferenza. "Eu creo que o que marca a diferenza é unha combinación entre o exterior e o interior. De feito, neste concurso non só se valora o físico senón tamén todo o que hai detrás: a formación da persoa, as súas capacidades, etc. Se non, cunha foto bastaría. Non farían falta tantas probas".
POLÉMICAS
Andrade en traxe tradicional. CEDIDA |
Míster International Spain xerou este ano varios debates nas redes sociais. O primeiro, sobre se o estremeño Manuel Romo merecía ser o gañador. "Aí tivo moito que ver unha foto desafortunada. Todos temos algunha así. Él é realmente un mozo impresionante", explica José Andrade.
Outra polémica tivo que ver con que Míster Tarragona, Sada Keita, cuxos pais son de Mali, non chegase a estar no top 3, a pesar de ser un dos grandes favoritos para facerse co certame. Nas redes chegouse a acusar á organización de racista. "Para nada. Como dis, el foi todo o tempo un dos grandes favoritos, así que esas acusacións non teñen moito sentido. Son máis ben cousas das redes".
¿Preocúpanlle os haters? "Non, nada. É algo que está aí e sabes que te estás expoñendo a que aparezan. Eu intento tomarme todos eses comentarios a coña", di. "Mira, todo isto non creo que chegue a confundirme. Sigo cos pés na terra. Son exactamente o mesmo que era e teño moi presente de onde veño".