A editorial pontevedresa Ab origine acaba de publicar un amplo estudo do antropólogo José Luis Cardero, dividido en dous tomos, no que recompila a historia da esvástica como símbolo ao longo dos tempos. A obra será presentada este xoves (20.30 horas, entrada libre), no espazo Nemonon de Pontevedra, nun acto no que participarán o autor da obra, o historiador Luis Alonso Álvarez e o editor Valentín García Bóveda.
"Neste libro, o antropólogo José Luis Cardero penétranos no mundo dos símbolos, mostrándonos a ampla variedade que se esconde tras este tipo de representacións e asociándoos tanto a interpretacións populares como a outras de carácter especializado", explica o selo pontevedrés sobre este traballo. "A través dunha análise pormenorizada no que se entrelazan mitos e símbolos, o autor explora as connotacións históricas e contemporáneas dunha tradición simbólica que transcende a calquera especificidade cultural e que profunda nas orixes mesmos da humanidade".
A esvástica é un símbolo antigo que apareceu representado en diferentes culturas, desde a azteca e a budista á grega e a hindú. Posteriormente seguiu sendo utilizada ao longo da historia en distintas relixións e tradicións, con distintos significados, ata que en 1920 os nazis alemáns elixírona como símbolo. Desde entón asociouse primordialmente con eles.
