¡Que bonito o que pasou este martes no CIFP Carlos Oroza! Tanto o profesor Ricardo Fernández Guerra como a súa clase sabían que o luns e o martes eran xornadas moi especiais, pois plasmábase todo o traballo previo do proxecto A cociña da avoas recuperada polo alumnado, aprendemos delas. Este consistiu en recuperar antigas receitas das avoas e materializalas nas cociñas do centro educativo.
Hoxe visitounos Cipriana, autora da receita da empanada de bacallau con pasas,e batemos palmas por ela na cociña, emocionouse. Ao fin do xantar otorgou un 10'5 ao alumnado. Eran cinco pases e catro sobremesas e comeu todo e menú!!!
— Profesor FP - Ricardo Fernández Guerra (@profesorFP) January 25, 2022
Cipriana Carabelos, Salcedo, 85 anos ✊✊🤍💙🤍 pic.twitter.com/rl24L9Cb5s
Este martes produciuse un momento marabilloso, pois unha das protagonistas, Cipriana Carabelos, veciña de Salcedo, de 85 anos, foi a invitada de honra ao xantar. Súa é a receita da empanada de bacallau con pasas, que replicaron o seu neto, Adrián Rodríguez, de 23 anos, de Tomeza, e os seus compañeiros de 2º do ciclo medio de Cociña e Gastronomía. Conta o mozo que a empanada lle gustou a todo o mundo e a súa avoa quedou feliz e incluso recibiu felicitacións por ser tan boa mestra cociñeira. "Os fillos, todos os netos, os meus curmáns... A todos nos gusta moito. Faia todos os domingos", explica. Se elixiu esta receita e non outra foi, entre outras cousas, pola súa facilidade para racionarla e porque lle gusta a todo o mundo. Non quedou nin unha faragulla.
Na receita de Cipriana este manxar leva, ademais de bacallau e pasas, cebola, pemento vermello, pemento e un toque de azucre. Cipriana quedou encantada tamén co resto do menú, composto por sardiñas recheas asadas, tortillas montadas, mexillóns mariñeira á crema, pescada con cebola e ameixas, bisté de solombo ao viño branco con pataca rechea e, de sobremesa, leite frito, torta de queixo, filloas e rosquillas. Todo elaborado con receitas de avoa e delicioso.
Foi unha das mellores prácticas na historia do Carlos Oroza e a guinda foi un emotivo aplauso para Cipriana.
