A xunta directiva do Liceo Casino de Pontevedra acordou suspender a cea baile da Peregrina, prevista para o 8 de agosto. A anulación foi anunciada este martes pola entidade, que asegura que "coa normativa vixente non é posible celebrar a festa como nas edicións precedentes".
Nesa liña, detalla que, "aínda que todo apuntaba á suspensión", esperouse para tomar a decisión ata a publicación da normativa da Xunta que regula a actividade de bailes e de verbenas este verán ante a pandemia de coronavirus. Con esas regras, segundo apunta o Liceo Casino, o aforamento debería ser de menos de 1.000 persoas que terían que manter a distancia interpersoal e usar no seu caso a máscara.
Así as cousas, asegura que esas condicións non permiten celebrar a festa como en anos anteriores, "e non parece oportuno nin conveniente celebrar outra distinta porque sería un torpe remedo que a ninguén satisfaría e que xeraría multitude de problemas".
"A xunta directiva ten claro que debe primar a seguridade dos socios, dos seus familiares e amigos ao desexo de vernos e manter as nosas relacións sociais", subliña a entidade, que lamenta a "repercusión" da suspensión nos socios e o comercio local.
