O alcalde de Pontevedra defendeu este xoves os desprazamentos a pé no foro El futuro de las ciudades, organizado polo Goberno central en Logroño como un punto de encontro para debater o papel das urbes logo da pandemia do coronavirus. "O transporte público é imprescindible nas grandes cidades, pero nas pequenas a idea principal debe ser camiñar", defendeu Miguel Anxo Fernández Lores, durante a súa intervención, na que recordou que a Organización Mundial da Saúde recomenda 10.000 pasos ao día
O rexedor do BNG compartiu debate coa directora do Centro de Investigación do Transporte da Universidade Politécnica de Madrid, María Eugenia López Lambas; co alcalde de Zaragoza, Jorge Azcón; a vicerreitora de Responsabilidade Social Corporativa da Universidade da Rioxa, Fabiola Portillo, e con Damián Martín, alto cargo de Cooltra, unha firma dedicada ao aluguer de motos a particulares e empresas. E durante a súa intervención, da que informou o Concello a través dun comunicado, repasou outros asuntos como o uso do automóbil. "Nas cidades o que ten que haber son os coches imprescindibles", subliñou.
Antes do inicio da xornada e a preguntas da prensa, recollidas en castelán pola axencia de noticias EFE, Lores subliñou que se deben tomar "decisións políticas" para garantir un desenvolvemento urbano sostible. "Cada cidade debe buscar o seu propio modelo", reivindicou.
O alcalde de Pontevedra tamén recoñeceu que medidas como as peonalizacións "sempre" xeran un rexeitamento inicial por parte dos partidos da oposición, "pero iso é marrullería política". "Nunca se logra un consenso total, aínda que meses despois os veciños apoian nas urnas que sigas mellorando a súa calidade de vida", concluíu.