A negociación deu o seu froito. Miguel Anxo Fernández Lores e Tino Fernández asinaron este xoves o pacto que permitirá ao BNG e ao PSOE gobernar durante os próximos catro anos coa tranquilidade dunha maioría absoluta formada por 15 edís nunha corporación de 25 membros.
Os dous líderes municipais compareceron na sala de prensa do Concello, onde escenificaron o acordo cun apertón de mans e unha rolda de prensa conxunta na que deixaron claro que o novo "Goberno nacionalista e progresista” de Pontevedra rexerase polos principios da "lealdade e respecto mutuo".
De momento só aclararon que Lores afrontará o seu sexto mandato consecutivo como alcalde e Fernández será o primeiro tenente de alcalde e, polo tanto, ocupará o posto de rexedor en ausencia do primeiro. No entanto, a repartición de áreas entre os edís dun e outro partido preferiron reservalo coa intención de facelo público este venres. O único que sinalaron é que todos os concelleiros nacionalistas e todos os socialistas ostentarán áreas de Goberno e, aínda que será "un Goberno único" cunha "actuación coordinada", cada grupo terá "autonomía nas súas áreas de xestión". De feito, un dos principios do acordo foi a creación dunha comisión paritaria de seguimento que mediará no caso de que xurdan discrepancias.
"Entre as dúas forzas queremos mellorar durante o próximo mandato a calidade de vida de todos os cidadáns, potenciando o dinamismo económico e a proxección exterior da cidade e cun enfoque destinado á mellora do medio ambiente, que vai ser un eixo fundamental deste mandato. As cidades do futuro teñen que ser creativas e innovadoras", manifestou Fernández Lores. "Os principios programáticos deste novo Goberno báseanse na cohesión social, no respecto pola nosa identidade, no equilibrio territorial, na equidade, en políticas redistributivas en beneficio das persoas con máis dificultades, no fomento da igualdade real, na posta en valor dos nosos recursos naturais e culturais e no respecto pola diversidade".
Así mesmo, Tino Fernández indicou que este acordo recolle o mellor dos proxectos dos dous partidos e agora toca poñelo a funcionar" e engadiu que as dúas forzas políticas estableceron "unha folla de ruta equilibrada e compensada” na que “non fixo falta que ninguén cedese en exceso", dixo. "Todos queremos seguir xerando unha cidade respectuosa, amable e tamén recoñecida internacionalmente".
