O alcalde de Pontevedra, Miguel Anxo Fernández Lores, reiterou esta semana ante a Xunta a colaboración do Concello para desbloquear a variante de Alba, un proxecto que se reclama desde hai máis de 16 anos. Tras haberse posto en contacto telefónico con Alberto Núñez Feijóo a principios de mes, o rexedor do BNG remitiu unha carta ao presidente autonómico e outra á conselleira de Infraestruturas, Ethel Vázquez. En ambas as misivas solicita o apoio da Administración galega para a execución da obra e traslada a alternativa deseñada polo Goberno pontevedrés para reducir o impacto da mesma.
"Pontevedra precisa unha conexión de calidade entre a estrada de Santiago (N-550) e a de Vilagarcía (PO-531) para mellorar o tráfico perimetral da cidade", explica Lores, que sinalou ao acceso a Montecelo desde a PO-542, a Monte Porreiro desde a N-550 e á avenida de Josefina Arruti como exemplos de viarios impulsados para mellorar a circulación de coches e aumentar a seguridade viaria dos veciños.
A proposta exposta polo Concello aposta pola alternativa elixida pola Xunta para a variante de Alba, con saída desde o núcleo do Freixo e chegada na Cendona, pero introduce modificacións. A máis importante é que reduce o ámbito de afectación no territorio e o seu custo. "Alén de non afectar aos núcleos de poboación, tamén mellora a calidade de vida das persoas que o habitan: mellor acceso ás leiras e vivendas; conexión interparroquial entre Lérez, Alba e Campañó; accesbilidade peonil e ciclista; bo alumeado; mellora da accesibilidade ao centro e saúde de Lérez ou autonomía e seguranza das nenas e nenos", indica o alcalde a Feijóo.
A pelota do proxecto, que en teoría tería que executar a Xunta, pero que Pontevedra se ofrece a liderar se se lle garanten fondos, está agora no tellado do presidente autonómico e da conselleira.
A actuación conta co apoio dos consellos parroquiais de Alba e Lérez, pero non así co de Campañó, que rexeita –do mesmo xeito que o PP local– esta formulación. Aínda así, o rexedor do BNG considera que a obra si é apoiada por veciños desta última parroquia.
