O alcalde, Miguel Anxo Fernández Lores, saíu este xoves ao paso da petición de dimisión por parte do PP pola polémica ao redor da súa casa, que estivo 22 anos sen licenza de primeira ocupación. "Teño a conciencia tranquila, non hai motivos para a dimisión", dixo o rexedor do BNG en resposta a un oínte no programa La Opinión de Radio Pontevedra.
Lores insistiu en que cumpriu con toda a documentación solicitada polos técnicos do Concello para regularizar a súa vivenda, á que lle faltaba este trámite, que solicitou ao darse conta de que carecía del no verán do ano pasado, cando pediu o correspondente permiso municipal para construír unha piscina no seu domicilio de Marcón.
O líder nacionalista considera que a postura mantida polo principal grupo da oposición "é unha manipulación intencionada" e defendeu que a súa casa cumpre coa legalidade vixente. "Non hai ningunha irregularidade na casa do alcalde", recalcou ante a audiencia radiofónica.
Lores lanzou, por outra banda, unha mensaxe de tranquilidade aos propietarios de vivendas sen licenza de primeira ocupación en Pontevedra (unhas 575 segundo os cálculos municipais). "Non se vai perseguir a ningún cidadán. O que nos importa é que as obras sexan legais", dixo en referencia á obrigatoriedade de que as reformas teñan licenza de obra. A de primeira ocupación non se solicita por falta de medios.
