A súa primeira reacción foi de sorpresa ao decatarse de que a súa administración dera o premio. "Estaba de cea cunhas amigas e chamáronme para contarme que dera o premio e a cantidade. Non podía facer moito pero sentín unha alegría inmensa", relata. O luns foi un día de celebración tanto para ela como para os seus clientes: "Desde primeira hora da mañá estanme felicitando todos os que entran. E onte –polo– domingo paseime a tarde ao teléfono", conta orgullosa.
Ao longo da súa traxectoria repartiu centos de premios, pero deste último queda cravada a espinita de non poder dar máis. "A pena é que é un de seis, só faltaba o reintegro e tocasen 20 millóns. Un máis e sería mellor. Eu quería dalos", apunta, referíndose á Combinación Especial que resulta do acerto de seis númeos e o reintegro, que foi o que faltou.
E entre as esperanzas, mantén tamén a de saber quen foi o agraciado deste premio. "Hoxe –polo– luns pola mañá o primeiro que fixen foi mirar os abonados, que temos moitos, polo si ou polo non para chamar, pero non era ningún", apunta. Non sabe de quen se trata, pero se tivese que elixir, "gustaríame que fose un cliente habitual". Aínda así, desde o luns, a Administración número 2 de Joaquín Costa loce un cartel máis, un dos máis grandes que ten o seu escaparate e con iso xa sente tranquila. "Sexa de quen sexa, a sorte é del".
ANTECEDENTES. Olga Juncal ten xa unha ampla experiencia nisto de repartir premios. O último deuno o pasado mes de maio nun boleto de segunda categoría que contiña 42.000 euros no sorteo da Bonoloto. Pero nesta administración todos os premios son especiais. "Fai un intre veu unha señora que me dicía que a ela non lle tocaba nada e xusto deille máis de 80 euros e quedou asombrada. Só con iso xa son feliz", apunta.
Iso si, Juncal ten claro que se puidese elixir o próximo premio que repartir, sería o da "lotería do xoves. é o único premio que me falta por dar". Tras a celebración ten na súa cabeza a entrega do seguinte "porque o haberá".
