Efectivos da Policía Local de Pontevedra mobilizaron aos membros do Parque Municipal de Bombeiros sobre as 17.00 horas deste venres, tras comprobar que desde a parte superior dun edificio situado na intersección das rúas Oliva e Michelena saía unha densa fumareda de ton negruzco.
Dous vehículos do servizo de urxencias chegaron ao lugar á vez que os axentes da Xefatura acordoaban a zona. O obxectivo era dar co foco da inci
dencia e resolvelo canto antes. Así, a primeira manobra consistiu en empolicarse á parte alta do inmoble desde a Praza da Peregrina. Para iso empregaron o camión co brazo articulado, o que lles serviu para constatar que o fume saía desde a cheminea do edificio.
Desde ese momento souberon que a situación estaba baixo control, pois tratábase dunha mala combustión que partía da zona de caldeiras. O seguinte paso foi dirixirse a ese punto para apagar o sistema de calefacción, e asunto resolto. Agora serán os propietarios quen deberán facerse cargo.
