Malos cheiros, restos de lixo, ruído ou pelexas, eses son algúns dos problemas cos que teñen que convivir os veciños e comerciantes do centro da cidade. E aínda que estes a incidentes se producían antes da pandemia, o certo é que por mor da reapertura do lecer nocturno a situación volveuse aínda máis insostible.
En rúas como Sagasta os empresarios aseguran que tiveron que reforzar a limpeza nos seus locais. Un exemplo é a Mercería Anabeti, situada xusto en fronte dun pub, onde "tivemos que cambiar o día de limpeza, que era o xoves, e polo o luns, porque cando chegamos a abrir non se ve nin as pezas que hai, está moi sucio, é horrible", explica Beatriz Puga.
Xusto á beira deste comercio están situadas as galerías Virxe do Camiño, as cales, aínda que pola noite están pechadas, tamén sofren directamente as consecuencias da mocidade que se aglomera cada fin de semana ao peche das discotecas.
"Os rapaces ouriñan no enreixado e, ademais, sempre hai cristais rotos, vasos por aí tirados, plásticos...", afirma David González, da tenda Aquadance.
O enfado esténdese a todos os comercios desta rúa. Outro exemplo é Yamayay, onde Natalia Martínez asegura que "eu teño saído un xoves da tenda e non podes pasar pola beirarrúa da xente que hai. Ademais de que despois déixanme a cristaleira sucia, chea de pegotes de man e de esgarros".
Sen esquecer os malos cheiros, que, tal e como confirma Joseline Gómez, da tenda Quomo, son persistentes. "Temos que tirar de fregona e lejía porque ás veces os cheiros son bastante fortes, e caro, isto de face ao comercio non nos vén nada ben".
A situación é crítica tamén para os veciños, a quen os berros e as pelexas impídenlles conciliar o soño.
"Hai moitísimos berros ás 4 da mañá, así é imposible durmir", asegura Ana Puga, unha pontevedresa que vive en cálea Cruz Gallástegui e que asegura que o pasado fin de semana, durante a celebración de Halloween, os altercados aumentaron. "Tanto o sábado como o domingo foi horrible. é que non podiamos entrar no garaxe do sucio que estaba".
CONCELLO. Ante estas queixas, o Concello de Pontevedra xa anunciou que reforzará a presenza policial nas rúas da cidade durante todo o fin de semana.
Iso si, a portavoz do goberno local, Anabel Gulías, asegurou que o fin de semana de Halloween transcorreu con absoluta "normalidade agás algúns incidentes", pero recoñeceu que si que hai problemas entre os veciños e comerciantes polas aglomeracións de xente que se producen nas entradas e as saídas dos pubs.
Neste sentido, a administración municipal segue defendendo a súa decisión de reabrir o 'botellódromo' algo que, trata de 'baleirar' o centro da zona vella de mozas bebendo.
No lado oposto atópase o PP, que propuxo sentar nunha mesma mesa a responsables da Policía Local, a Garda Civil e a Policía Nacional, así como tamén a persoal do departamento municipal de Benestar Social, co obxectivo de atallar este problema.
Mentres tanto, os veciños seguen reclamando solucións que poñan fin, dunha vez por todas, a estes altercados.
Joseline Gómez, de Comercio Quomo: "Está todo cheo de cristais e cabichas"
Ana Puga, veciña: "Non podemos entrar aos garaxes"
David González, da tenda Aquadance: "O enreixado sempre está sucia e mea"
Beatriz Puga de Mercería Anabeti: "Os luns está todo desastroso"
Natalia Martínez da tenda Yamamay: "A solución é que se lles eduque"
